Sekretari gjerman i Shtetit për Evropën, Michael Roth tha se ishte “thellësisht i zhgënjyer” nga fakti që Këshilli i Bashkimit Evropian nuk kishte miratuar ende konkluzione të zgjerimit ose s’kishte rënë dakord për kornizat negociuese për Maqedoninë e Veriut dhe Shqipërinë.
“Eshtë një goditje e hidhur për politikën tonë ndaj Ballkanit Perëndimor, qëllimi i së cilës është zhvillimi i stabilitetit dhe demokracisë në këtë rajon”, tha ai.
Në fund të takimit të fundit të Këshillit të BE, të cilin ai e kryesoi në emër të Gjermanisë, Roth theksoi se BE duhet të angazhohet për procesin e zgjerimit dhe se “ka unitet të gjerë” brenda vendeve anëtare për këtë çështje.
Ai shton se “përparimi i domosdoshëm” në fushën e politikës së zgjerimit pritet në ditët e ardhshme ose gjatë presidencës së ardhshme portugeze të BE, në gjysmën e parë të 2021.
“Nuk është thënë më nëse, por kur do të hapen negociatat e reja,” tha Roth. /tesheshi.com/
