Sa më shumë që ngushtohet afati kohor për formimin e qeverisë me mandatar Nikolla Gruevskin dhe VMRO-në si parti fituese e zgjedhjeve, aq më shumë shtohen spekulimet mbi kushtet që kjo parti ia ka ofruar BDI-së, për ta bindur që të pranojnë koalicionimin me to.
Së fundmi nëpër media kanë filluar të qarkullojnë lajme se gjoja tani gjithçka është gati për formimin e qeverisë së re ndërmjet VMRO-BDI-së.
Si kompensim për pikat e “Platformës Shqiptare”(dokument ky i nënshkruar nga gjitha partitë shqiptare në Maqedoni nën rekomandimin e kryeministrit Edi Rama, pikat e së cilës janë të panegociueshme për formimin e qeverisë së re), VMRO-DPMNE i ka ofruar BDI-së më shumë poste ministrore sesa në përbërjen e kaluar qeveritare, gjithsej 8 të tilla.
Përveç këtyre posteve mësohet se VMRO ka ofruar edhe kryetarin e Kuvendit.
Ndërkaq, nga platforma e përbashkët shqiptare VMRO ka ofruar avancim të gjuhës shqipe në komunat ku shqiptarët janë mbi 20 për qind, por jo zyrtarizim të plotë të gjuhës shqipe.
Kjo sipas burimeve partiake është oferta e fundit e partisë së Nikolla Gruevskit, të cilën aktualisht e shqyrtojnë anëtarët e kryesisë qendrore të BDI-së.
Gjithashtu, në këtë ofertë parashihet edhe përfshirja e shqiptarëve në bisedimet për emrin dhe procesin eurointegrues.
Por asnjë informatë nuk ka për pikat e tjera të platformës siç ishin ndarja e buxhetit me badenter, qeveri me badenter, detenizimi i simboleve shtetërore, himnit dhe stemës si dhe për mandatin e Prokurorisë Speciale Publike dhe ligjin e dëshmitarëve.
Nga ana tjetër, ndonëse as BDI-ja e as VMRO-ja nuk komentojnë nëse kanë arritur marrëveshjen për formimin e qeverisë së re, madje opinioni nuk është njoftuar nga këto parti për postet ministrore, nga Shqipëria kanë mbërritur urimet e para. Partia Demokratike e Shqipërisë përshëndeti arritjen e marrëveshjes për krijimin e qeverisë së re në Maqedoni. Në një njoftim për mediat, zyra e shtypit të PD thotë se: “Përveç stabilitetit politik në Maqedoni, marrëveshja të cilën faktori i bashkuar shqiptar ia doli ta përcaktojë si kusht për krijimin e qeverisë së re, është një sukses në realizimin e interesave të shqiptarëve në Maqedoni.”
Më tej PD thotë se: “Kryelajmi është se si produkt i këtij angazhimi të përbashkët shqiptar, gjuha shqipe, do të jetë gjuhë zyrtare në Maqedoni. Progresi në përfaqësimin e shqiptarëve në pozicione kyçe të qeverisë së re është një garanci se kjo platformë do te zbatohet. Prania shqiptare përcaktuese në qeverinë e re të Maqedonisë është një garanci për procesin e qëndrueshëm të anëtarësimit të Maqedonisë në NATO.”
Por ja që dhe partia më e madhe opozitare në Shqipëri ka rënë preh spekullimeve. Zyrtarisht asgjë nuk vendosur e thënë. M.Krasniqi – /tesheshi.com/
