Lukas Podolski do të luajë ndeshjen e tij të 130-të dhe të fundit për përfaqësuesen gjermane kur ajo të përballet me Anglinë në miqësoren sonte në Dortmund.
Ai do t’i japë fund kështu karrierës ndërkombëtare, dhe vetëm 31 vjeç do të lërë dhe Europën në fund të sezonit, për t’u zhvendosur në Japoni, aty ku do të luajë për Vissel Kobe.
Fitues i Kupës së Botës me Gjermaninë, ai ka shënuar 48 gola për kombëtaren. E gjitha kjo do t’i shpërblehet me shiritin e kapitenit në ndeshjen e tij të lamtumirës.
“Eshtë sensacionale. Nuk mund të kërkoni më shumë,” tha lojtari i Gallatasarajit në konferencën e shtypit.
“Paraqitja ime e fundit do të jetë një moment i dashur për mua, por gjithashtu brengosës. Jam i kënaqur që do të kem mundësinë t’u them mirupafshim tifozëve,” do të shtonte Podolski.
Joachim Low, trajneri i përfaqësueses, teksa u pa ta përqafonte Podolski-n në konferencën për shtyp, e përshkroi atë si një prej lojtarëve më të mëdhenj që ka nxjerrë Gjermania. /tesheshi.com/
