Nga Mensur Krasniqi
BDI e Ali Ahmetit, në aksionin e saj protestues ndaj kryqit maqedon në komunën Butel, të parë si karshillëk inatçor ndaj shqiptarëve, ka ndërthurur aktet e opozitës në Tiranë e Prishtinë, si të ishin ato receta mbarëkombëtare në formën e reagimit.
Pra, atë që nuk mundi ta ndal institucionalisht, meqë është dhe në pushtet, partia e Ali Ahmetit e ndaloi me forcë. Disa qindra simpatizantë të BDI-së në krye me udhëheqësinë e kësaj partie, duke protestuar kundër vendosjes së kryqit gjigant në lartësi prej 55 metrave në komunën e Butelit në Shkup, u kanë vënë flakën disa palmave të cilat gjendeshin aty pranë, si dhe i kanë larguar rrethojat nga vendi ku pretendohet të ndërtohet kryqi.
Protestës i prinë funksionarë të lartë të BDI-së, si kryetari i komunës së Çairit, Izet Mexhiti; ministri i Arsimit dhe Shkencës, Abdylaqim Ademi; deputetët Ermira Mehmeti, Artan Grubi, Xhevat Ademi, dhe shumë funksionarë të tjerë.
Sipas Mexhitit, vendimi i këshillit të komunës së Butelit për vendosjen e kryqit është një provokim i madh për komunitetin e dytë më të madh në vend, meqë në këtë komunë sipas tij jetojnë pjesa dërmuese shqiptarë dhe myslimanë.
“Jemi mbledhur këtu për të shprehur kundërshtimin tonë si komunitet i dytë më i madh në vend, lidhur me vendimin përjashtues të Komunës së Butelit, vendim i cili ka vetëm një qëllim: përmes instrumentalizimit të fesë për qëllime politike të provokojë dhe të prodhojë tensione dhe përplasje etnike në Maqedoni”, tha para mediave Izet Mexhiti, kryetar i Komunës së Çairit.
Para të pranishmëve mbajti fjalim edhe koordinatori i degës së Çairit, Bekir Asani, i cili tha se nuk mund të sillen vendime pa konsultimin e shqiptarëve. Bekiri paralajmëroi se prej sot do t’i vendosin tendat dhe nuk do të largohen derisa të terhiqet vendimi për vendosjen e kryqit.
Ajo që është për t’u çuditur, janë forcat e shumta policore që edhe pse ndodhen në vendngjarje, as që kanë tentuar të pengojnë bastisjet e gurthemelit të kryqit dhe vënies së flakës ndaj palmave që ndodheshin aty. /tesheshi.com/
