Nga Blendi Gashi
Qielli i kryeqytetit të Kosovës të premten në mbrëmje pas zgjedhjen së Hashim Thaçit president u mbulua nga fishkezajrret. Por, jo vetëm nga to. Për të bërë të zjarrtë dhe më të zhurmshme situatën u përkujdesën simpatizantët e Partisë Demokratike të Kosovës të cilët për liderin e tyre, njëherit presidentit e ri gjuajtën edhe me armë zjarri.
Mediat kosovare kanë kapur pamje dhe incizuar momentin kur një person me kapele shtënë me pistoletë, nga selia e PDK-së që gjendet në sheshin “Nënë Tereza” në Prishtinë.
Por, përkundër se policia ishte pak metra larg vendit të ngjarjes nuk reagoi për t’i vënë prangat simpatizantit të PDK-së, pasi dihet se përdorimi i armëve të zjarrit është vepër penale.
Mosreagimi i menjëhershëm çon në konkludimin e dhënë jo vetëm nga partitë opozitare por edhe nga njohësit e fushës së sigurisë se në Kosovë po përdoret drejtësi selektive.
Policia e Kosovës s’jep detaje
Portali tesheshi.com ka kontaktuar Policinë e Kosovës për të marrë një përgjigje se a kanë marrë apo jo masat e nevojshme ndaj personit që është kapur duke shtënë me armë nga zyra kryesore e PDK-së.
Policia, në përgjigjen e dhënë me shkrim nuk ka treguar nëse kanë arrestuar apo jo personin në fjalë duke thënë se ndërmerr veprime konform të gjeturave.
“Policia e Kosovës (PK) të gjitha veprimet e saja në të gjitha rastet i ndërmerr konform autorizimeve ligjore që ka. Edhe në rastet kur kemi të bëjmë me armëmbajtje pa leje apo përdorimit të armeve të zjarrit, i ndërmerr veprimet e saja të menjëhershme në parandalimin, konfiskimin dhe arrestimin e personave të dyshuar. Per 24 oret respektive PK-ja ka intervenuar në dy raste të evidentuara për armëmbajtje pa leje ( I keni të publikuara në raportin 24 orësh). Po ashtu të gjitha informacionet, video-publikimet e bëra në media/portale të ndryshme, PK-ja me njësitet e saja relevante i trajton dhe konform të gjeturave ndërmerr veprime konkrete në konsultim edhe me prokurorët kompetent”, thuhet në përgjigjen me shkrim të dërguar në Zyra për informim e policisë.
Ekspertët e sigurisë: Policia është dashur të arrestoj simpatizantin e PDK-së
Njohësi i çështjeve të sigurisë, Burim Ramadani, thotë se përdorimi i armëve të zjarrit është një vepër penale, sikurse edhe vet armëmbajtja pa leje, aq më keq, kur të dyja këtyre veprave penale u shtohet edhe motivi politik, që nënkupton një kërcënim të hapur publik.
“Thjesht dhe qartë, Qeveria duhet që urgjentisht të distancohet nga një person i tillë dhe të kërkojnë nga institucionet e zbatimit të ligjit që të veprohet menjëherë dhe fuqishëm. Në rast të mungesës së kësaj, qartësisht dëshmohet sjellja me dy standarde e Qeverisë, përkatësisht dëshmohet një logjikë e kërcënimit publik.
Policia e Kosovës, fatkeqësisht, po vazhdon të tregojë sjellje krejtësisht të ndryshme dhe joprofesionale. Policia është dashur patjetër që në atë moment të reagojë dhe arrestojë personin apo personat që kanë bartur armë ilegalisht dhe që kanë përdorur armët e zjarrit. Për më keq, tash e disa ditë, nuk ka pasur veprime të Policisë dhe kjo jashtëzakonisht hapur dëshmon për joneutralitet”, thotë Ramadani.
Ndryshe, me armë zjarri u gjuajt edhe në qytete dhe fshatra të ndryshme tëvendit natën kur Thaçi u bë president, por që shumica e personave që shkrepën armë nuk u kapën, pasi policia në raportin e saj 24 orësh ka njoftuar se ka intervenuar vetëm në dy raste, për siç thotë të armëmbajtjeve paleje. /tesheshi.com/
