Fernando Alonso, një prej atyre kampionëve që pilotojnë ende në Formula 1, ka lënë të kuptohet se shpejt mund të largohet.
I shpallur kampion dy herë në vitet 2005 e 2006, spanjolli ka lënë pas një sezon shumë të vështirë me skuderinë McLaren-Honda. Sezoni i ri po ashtu nuk po është shumë shpresëdhënës për të, edhe pse Alonso ia ka dalë falë talentit të tij të bëjë disi përpara.
Në një intervistë për francezen L’Equipe, Fernando Alonso e ka bërë të qartë se karrierës së tij në Formula 1 po i vjen fundi.
“E ndjej tani sikur po i afrohem fundit të ëndrrës time,” ka thënë piloti spanjoll.
“Kur nuk jeni mjaftueshëm i shpejtë, kur nuk e shijoni më, dhe kur nuk i përmbushni kërkesat, ju e dini se është koha për t’u larguar.”
34-vjeçari e ka bërë të qartë se nuk do të garojë thjesht për hir të garimit, e se do ta largohet sapo të mos e shijojë më garimin.
I pyetur për planet pas tërheqjes nga Formula 1, Alonso nuk ka dhënë një përgjigje të prerë, por është shprehur se mund të marrë pjesë në ndonjë garë ku nuk kërkohet përkushtim me kohë të plotë, si në atë të Le Mans-it. /tesheshi.com/
