Ndryshojnë procedurat për sekuestrimin e banesave dhe bizneseve nga bankat. Të enjten, Kuvendi miratoi Kodin e Procedurës Civile dhe Kodin Civil, të propozuar nga bankat dhe Ministria e Drejtësisë. Gjatë diskutimit të tyre në komisione pati shumë debate, pasi bankat kërkonin që objektet e sekuestruara të shiteshin me 30% të vlerës. Por Kuvendi i ka rrëzuar.
Në variantin e fundit të Kodit të Procedurës Civile që u miratua të enjten, datë 3 nëntor, është parashikuar se në ankandin e tretë, objekti nuk do të shitet me 30 për qind të vlerës, por me 10 për qind zbritje të vlerës së tij reale.
Kjo thuhet qartësisht në nenin 8 të ligjit. “Në rast se në ankandin e dytë nuk është paraqitur asnjë ofertues, atëherë, brenda 10 ditëve nga përfundimi i tij, përmbaruesi gjyqësor cakton çmimin e ri të sendit, jo më të ulët se 10% të çmimit të përcaktuar nga përmbaruesi, në ankandin e dytë. Ankandi i tretë për shitjen e sendit bëhet sipas rregullave të përcaktuara në paragrafin e parë të nenit 568, të këtij kodi, dhe zhvillohet jo më vonë se 30 ditë nga e nesërmja e datës së caktimit të çmimit të ri”, thuhet në nenin 8 të ligjit.
Ankandi i parë për shitjen e një objekti është me vlerën e tij reale, që është vlerësuar nga përmbaruesi privat në asistencën teknike të një eksperti të licencuar të fushës. Fillimisht, bankat kishin propozuar shitjen e objektit me zbritje në masën 70 për qind, duke e parë këtë si një mënyrë që do të shmangte krijimin e kredive të këqija. Gjatë diskutimeve në komision pati shumë qëndrime, por në variantin e fundit të ligjit shihet se Kuvendi ka rrëzuar kërkesat e tyre. /tesheshi.com/
