Në një reagim mbi atë që po përfolet më së shumti këto ditë, ndryshimin e kufijve, e që ka si protagonist presidentin Thaçi, kryeministri Haradinaj përmendi luftën si kartë.
“Kufijtë janë vendosur me luftë, veç lufta i luan. Kush kujton se luhen kufijtë ndryshe, gabim është”, tha shefi i qeverisë së Prishtinës, duke bërë të qartë tashmë dhe qëndrimin e tij se është kundër asaj çfarë propozon presidenti Thaçi. Reagimi i Haradinajt erdhi pak pasi kreu i shtetit e potencoi akoma dhe më shumë çështjen e asaj që ai e quan “korrigjim kufijsh”, duke paralajmëruar shtatorin si kohë e bisedimeve për ta marrë Luginën.
“Këta kufij janë vendosur nga lufta e fundit e Ushtrisë Çlirimtare të Kosovës dhe ndërhyrja e NATO-s. Këto janë kufij lufte, janë dhjetëra mijëra njerëz në tokë për këta kufij. Është bukur imagjinatë e lehtë të mendohet që dikush luan me kufij. Nuk luhet me këta kufij”, theksoi Haradinaj me gjuhë militare, për të kaluar më pas te gjuha politike.
“Ajo që ka mbetur në mes të Kosovës dhe Serbisë është njohja reciproke, dialogu është për njohje, në këta kufij, në këto të drejta. Kjo ka mbetur. Për këtë e mbështesim presidentin”, theksoi Haradinaj. /tesheshi.com/
