Ndryshe fotoja, ndryshe fjalët: Thaçi, i hidhur me Berlinin

Presidenti Thaçi ka përcjellë një ndjesi jo aq entuziaste nga Berlini, aty ku me inisiativë të dyshes Merkel-Macron, liderë të Ballkanit u mblodhën për të diskutuar të ardhmen e rajonit.

“Në hapjen e Samitit të Berlinit fola për bashkëpunimin rajonal dhe pajtimin. Situata dhe relacionet janë në nivel të ulët, prandaj në rrethana të tilla shumë iniciativa të mira nga Procesi i Berlinit kanë mbetur pa u realizuar. Kjo situatë e keqe nuk mund të tejkalohet vetëm me deklarata dhe premtime abstrakte. Duhen vendime të guximshme nga shtetet e rajonit, të cilat nuk do të ndodhin për aq kohë sa nuk ka vendime të guximshme dhe strategjike nga Bashkimi Evropian dhe shtetet anëtare”, shkroi Thaçi

Ai më tej qe konkret kur u shpreh:

“Edhe pajtimi do të jetë i pamundur për aq kohë sa Serbia dhe Bosnje e Hercegovina nuk e njohin pavarësinë e Kosovës. Gjermania dhe Franca kanë mundësi ta marrin lidershipin për këto vendime të guximshme. Por, një prej vendimeve të para që Bashkimi Evropian do duhej ta merrte është liberalizimi i vizave për qytetarët tanë. Kosova padrejtësisht ka mbetur vendi më i izoluar në Evropë. Qytetarët e Kosovës janë populli më proevropian në rajon dhe është shumë e padrejtë të vazhdojnë të diskriminohen”.

Por siç mund te shihet dhe në foto, ka patur dhe momente ngazëllyese mes palëve. Në një rrethanë të shpenguar, liderët pjesëmarrës janë shfaqur tejet shoqërorë, por jo aq Thaçi e Vuciç, pozicionuar në distancë nga njëri-tjetri.   /tesheshi.com/