Trajnerët gjithmonë janë “kokë turku” për mos rezultatet e skuadrës, por një i tillë u bë pa arsye. Skënder Shengyli është shkarkuar nga posti i trajnerit të ‘Lirisë’ së Prizrenit me motivin se nuk posedon liçencën A për trajner, ndonëse udhëhoqi skuadrën në Ligën e Parë përgjatë një sezoni. Mirëpo, sezoni i ri në Superligë nuk e zuri atë në bankinën e prizrenasve duke u shkarkuar para kohe.
Ndërkohë në një prononcim për disa mediume kosovare, Shengyli nuk e pranon arsyetimin që i është dhënë me rastin e shkarkimit të tij, ndonëse ishin marrë vesh kohë me pare.
“Më thanë se më kanë shkarkuar që nuk e kam licencën. Në fakt, ne për këtë punë kemi biseduar menjëherë pas kampionatit të Ligës së Parë. Ju kam thënë që nëse doni të vazhdoni me mua, mund ta marrim një trajner me licencë A sa për të qëndruar në bankinë, ashtu siç bënte Hajvalia edicionin e kaluar, derisa unë të pajisem me licencë”, deklaroi Shengyli.
Klubi prizrenas ende nuk ka bërë të ditur qëndrim lidhur me këtë çështje, ndërkohë mësohet se klubi nga “Përparim Thaçi”, veç se ka filluar të mendojë të gjejë zëvendësuesin e Shengylit për sezonin e ri. /tesheshi.com/
