Një shtyllë elektrike është lënë në mes të rrugës në fshatin Tërstenik të Komunës së Drenasit. Kjo rrugë, siç shihet, vetëm sa është shtruar në zhavorr, ndërkohë që as punëkryersit, as komuna e as KEDS-i nuk e kanë marrë mundin që ta largojnë këtë shtyllë nga rruga.
Dhe nuk mbarron vetëm këtu, pasi në këtë shtyllë elektrike janë vendosur disa pankarta ku shkruhet se ata që kanë probleme me magjinë duhet që vetëm të vendosin një dry aty dhe problemet e tyre do të zgjidhen.
Por kjo shtyllë nuk është e vetmja, pasi dhe të tjera si ajo janë të vendosura skaj kësaj rruge.
Këshilltari komunal i Komunës së Drenasit, Xhavit Drenori ka publikuar disa foto nga kjo shtyllë duke ironizuar me faktin se ajo gjendet në mes të rrugës.
“Me te marre informacionin se në lagjen Cakaj në Tërstenik po ndërtohej rruga por shtylla elektrike po qendronte mu ne mes të rrugës, me disa anëtarë të ekipes vizituam lokacionin.
Aty pamë shtyllen, e cila “mbante mbishkrimet” se qytetarë që kanë probleme me “sehire” dhe me “dashni” gjëjnë ilaqin falas, thjeshtë duke vendosë një dry nën tabelën përkatëse.
Unë pas “analizës” me ekipen time rreth rezultatit jo të kënaqshëm në zgjedhjet e 4. dhjetorit 2016, “kemi ardhë në përfundim që kemi pasë të bame (sehire)”. Unë e vendosa drynin tek shënja “kundër sehireve” dhe me kismet në zgjedhjet e ardhme kush qe na del perpara nuk ka. Mos ju tregoni kundërshtarëve politik për këtë “recept” ju lutem”, ka ironizuar Drenori.
Ai ka shkruar se duke lënë anash ironinë për këtë rast, do të kërkojë nga autoritetet komunale në Drenas që ta largojnë sa më parë këtë shtyllë, e cila gjendjet në mes të rrugës.
“Ironia anash, është e pa pranueshme që kjo shtyllë elektrike të qëndrojë mu në mes të rrugës, përderisa me para të taksapaguesve të Drenasit po ndërtohet rruga. Nesër do të kërkoj sqarime edhe nga kryetari Lladrovci”, ka shkruar Drenori në facebook. /tesheshi.com/
