Afera e CEZ merr përpasa gjithnjë e më të zgjeruara. Prokuroria shqiptare po kërkon paratë e rryshfeteve që kanë marrë zyrtarët duke sekuestruar llogaritë bankare të Kastriot Islmailajt. Këtë kërkesë e ka bërë të ditur TCH nëpërmjet burimeve të saj.
Por ndërkohë, ky hap duket se vjen pas “hapjes” së njeriut kyç të aferës së borxheve.
Prokuroria e Krimeve të Rënda, i ka kërkuar gjykatës konfiskimin e llogarive bankare të Kastriot Ismailajt dhe të nënës së tij, Luftie Ismailaj.
Në referim të ligjit Antimafia, pohojnë prokurorët, ndaj këtyre dy shtetasve ka nisur hetimi pasuror, duke qenë se ndaj 52-vjeçarit po zhvillohen hetime për “mashtrim me pasoja të rënda, në bashkëpunim” dhe “pastrim parash”.
Llogaritë bankare të shoqërisë “ADC”, me administrator Kastriot Ismailajn, janë produkt i pastrimit të parave. Për subjektin “ADC”, shtojnë prokurorët, më herët janë sekuestruar e tashmë duhet të konfiskohen për të kaluar në llogari të shtetit, 8 depozita që janë me vlera të konsiderueshme, që të gjitha në valutat euro dhe dollarë.
Këto pasuri, thuhet në kërkesë, janë krijuar pas muajit janar të vitit 2010, kohë për të cilën ai është nën hetim për “mashtrim”, për dosjen e CEZ-it, ku sipas Prokurorisë së Tiranës ka dyshime se, duke krijuar shoqëri fiktive me objekt mbledhjen e borxheve, ai ka shkaktuar një dëm ekonomik prej afro 5 milionë eurosh.
Për këtë kërkesë të Prokurorisë, Gjykata e Krimeve të Rënda do të flasë në fillim të javës, ndërkohë që e njëjta gjykatë ka po ashtu nën shqyrtim edhe një dosje tjetër të ngjashme kundër nënës së Ismailajt, në llogaritë e së cilës janë kryer transaksione në vlerat mbi 150 mijë euro.
/tesheshi.com/
