Kryediplomati shqiptar e sheh problematike situatën në vendet e Ballkanit Perëndimor dhe në këtë konteskt ai kërkon nga Bashkimi Europian më shumë ndikim në frenimin e destabilitetin e këtyre vendeve.
Në një intervistë për “Koha ditore”, ministri i Jashtëm, Ditmir Bushati flet dhe për ndikimin rus në këto vende dhe i sheh marrëdhëniet shqiptaro-ruse si normale, por sipas tij Tirana zyrtare ka plot kundërshti me Moskën.
Ministri analizon situatën e përgjithshme, duke nisur nga kriza e zgjatur në Maqedoni, rezultat sipas tij i dështimit në implementimin e rregullave të demokracisë, si dhe funksionimit të dobët të institucioneve. “BE-ja duhet të eksportojë më shumë stabilitet për të frenuar paqëndrueshmërinë që vjen nga Ballkani Perëndimor”, shprehet ai.
I pyetur mbi rolin e Rusisë në rajon, Bushati shprehet se, “në thelb preferohet një marrëdhënie normale me Rusinë dhe eksplorimi i zonave të përbashkëta të interesit, por ka plot gjëra, mbi të cilat Tirana zyrtare nuk është dakord me të, duke kujtuar sesi Moska nuk humbet asnjë rast për t’i lidhur vështirësitë e vendeve të rajonit, me atë që e konsideron “përzierje të bllokut europian në çështjet e tyre të brendshme”./tesheshi.com
