Të dhurosh e sidomos për ata që kanë më shumë nevojë është vlera më e bukur njerëzore. Këtë fillim viti besimtarët muslimanë dhe jo vetëm i janë bashkuar një fushate dhurimi ndihmash për fëmijët e Sirisë që do të zgjasë 10 ditë. Qendra e Bashkëpunimit Ndërfetar në Elbasan kanë nisur fushatën sensibilizuese “Jo indiferentizmit…po solidaritetit”, për fëmijët e masakruar nga lufta në Siri në bashkëpunim me Kryqin e Kuq Shqiptar. Të parët që dhanë kontribute ishin Myftinia e Elbasanit, që dhuroi 5 milion lekë në ndihmë të fëmijëve të dëmtuar nga lufta në Siri dhe kompania SIGAL me 1 milion lekë. Ceremonia e dorëzimit të shumës u zhvillua me rastin e çeljes së fushatës sensibilizuese të ndërmarrë nga Kryqi i Kuq Shqiptar dhe Qendra e Bashkëpunimit Ndërfetar në Elbasan, e cila kulmon në 14 janar me marshimin e përvitshëm të paqes në Elbasan.
Janë bërë bashkë: Kryetari i Kryqit të Kuq, Ylli Alushi; Kryetari i QBNF, Arben Ramkaj; Myftiu, Agim Duka; Don Emilio Valente, At Gjergj Trebicka dhe Haxhi Dervish Ardit Selmani në mesazhin për të dhuruar në ndihmë të këtyre fëmijëve në zonën e luftës duke kërkuar solidaritet dhe kontribut me sa të munden.
Të gjithë përfaqësuesit e 4 komuniteteve fetare u bënë thirrje besimtarëve të që të kontribuojnë sa të munden për këtë ndihmë. Do të mbyllet në 14 janar kur edhe zhvillohet “Marshimi i Paqes”. Fondet do të shkojnë në ndihmë të fëmijëve në nevojë nëpërmjet rrugëve ndërkombëtare.
Myftiu i Elbasanit, Agim Duka, i dhuroi çekun prej 500.000 lekësh të reja Kryetarit të Kryqit të Kuq Shqiptar, Ylli Alushi. Me këtë rast myftiu Duka ka ftuar besimtarët myslimanë që të bëhen pjesë e këtij kontributi për të dhuruar më shumë paqe, humanizëm dhe dashuri.
Ndërkohë, Arben Ramkaj ftoi besimtarët muslimanë dhe jo vetëm për të kontribuar me sa të mundin nëpërmjet Kryqit të Kuq për të dërguar me sa të mundim ndihma për fëmijët viktima të luftës në Siri.
Alushi deklaroi se kjo nismë vjen si bashkëpunim i Kryqit të Kuq dhe Gjysmë Hënës së Kuqe në ndihmë të viktimave të luftës. “Synimi është mbledhja e ndihmave për më nevojtarët që janë fëmijët sirianë. Viktimat më tragjike janë fëmijët të cilët kanë nevojë që të gjithë të drejtojmë vëmendjen. Janë viktimat më të dhimbshme. Është detyrë e çdo individi që të shikojë mundësinë për të shpalosur atë vlerë të madhe që është humanizmi. Ne nuk bëjmë dallim ndaj fëmijëve që vuajnë. Lëvizja e Kryqit të Kuq dhe gjysmëhënës së kuqe kërkon të shpërndahet parimi i universalizmit pasi fëmijët janë të besimeve të ndryshme. Vlera e universalizmit i shërben lehtësimit të nevojave të fëmijëve sirianë. Ju ftoj të kontribuoni të gjithë me sa keni mundësi”.
Nisma duhet të përhapet në të gjithë Shqipërinë me qëllim që shumë shpejt Kryqi i Kuq të nisë ndihmat e para drejt vendit të luftës. /tesheshi.com/
