Turqia, aleatja më e ngushtë e Katarit dhe “motra e madhe” e këtij shtetit të Gjirit këto kohë të vështira për të, ka çuar deri më tani drejt këtij vendi 197 avionë mallrash, 16 kamionë dhe një anije, që kur filloi bllokada e katër vendeve fqinje. Kjo u bë e ditur nga ministri turk i ekonomisë, Nihat Zeybekçi.
Ky i fundit priti në Ankara homologun nga Katari, Ahmed bin Jassim al-Thani, duke thënë më pas se lidhjet tregtare detare dhe ajrore mes dy vendeve nuk janë ndërprerë, madje janë shtuar si ndihmë, që nga vënia e sanksioneve nga katër shtete arabe, me në krye Saudinë.
Këto të fundit e akuzojnë Katarin për lidhje me terrorizmin, të cilat Doha zyrtare i ka hedhur poshtë kategorikisht. Kjo e fundit nuk ka pranuar as një paketë me 13 pika, si kusht për ndërprerjen e sanksioneve dhe kthimin e raporteve normale, ku përfshihet dhe mbyllja e Al Jazeera-s. /tesheshi.com/
