Dhjetëra objekte pa leje i’u nënshtruan aksionit të Inspektoriatit Kombëtar të Mbrojtjes së Territorit në ambjentet e Universitetit Bujqësor në Tiranë. I pranishëm në këtë aksion ishte edhe ministri i Brendshëm, Saimir Tahiri, i cili bëri përgjegjës gjyqtarët e korruptuar, të cilët kanë lejuar ngritjen e ndërtimeve ilegale, duke zaptuar ambientet publike.
“Sot disa gjyqtarë ishin bërë gati të merrnin vendim për të siguruar këto objekte të paligjshme. Sepse, tashmë të kthyer në një praktikë klienteliste dhe korruptive të konsoliduar, sa herë gjendemi përpara një ndërtimi pa leje, pavarësisht dimensioneve të çudisë dhe paligjshmërisë, gjenden gjithmonë disa gjyqtarë, të cilët kanë bërë zakon shkeljen e ligjit për shkak të parasë, të marrin në mbrojtje ndërtimet pa leje dhe të ndalojnë institucionet të bëjnë detyrën”, u shpreh Tahiri.
Ai tha se të gjitha strukturat po angazhohen maksimalisht për të zbatuar ligjin e Vetting-ut, për të pastruar institucionet e drejtësisë nga zyrtarët e korruptuar.
“Ne jemi të vendosur të vazhdojmë me më shumë forcë sesa deri dje të gjithë procedurën e reformimit të sistemit të drejtësisë. Vetting-u është një hap që nuk ka kthim pas, pavarësisht rezistencës së të gjithë atyre që në ‘Frontin e të Keqes’ nuk duan që në këtë vend të ketë drejtësi për qytetarët, për fëmijët tanë dhe një Shqipëri më të drejtë e më të denjë. Ne jemi shumë të vendosur dhe këto janë shenja të njëpasnjëshme për të bërë atë për të cilën na kanë besuar qytetarët. Jo të gjitha i kemi bërë”, tha ministri.
Ky aksion ka në fokus lirimin e konvikteve të Universitetit Bujqësor të Kamzës, nga familjarët që i kanë kthyer ato në vendbanime, si dhe objekte të tjera që shërbejnë si bznese dhe shërbime të tjera./tesheshi.com/
