Ka ndërruar jetë një prej figurave klerikale të Kosovës, i cili i është bashkuar UÇK-së që në fillesat e saj, pikërisht në ’93. Fjala është për hoxhën nga Drenica Avdyl Krasniqi, për të cilin, Kadri Veseli ka shprehur konsiderata të larta në një mesazh ngushëllues.
“Më pikëlloi shumë lajmi për vdekjen e Hoxhë Avdyl Krasniqit, luftëtar dhe burrë i fortë nga Vojniku i Skenderajt. Imami i Xhamisë së Burojës ishte një trim i rrallë. Ishte bashkuar që nga viti 1993 në organizimin dhe luftën e Ushtrisë Çlirimtare të Kosovës.
Vepra dhe virtytet e tij do të jenë përherë në mendjet dhe zemrat tona. Ngushëllime familjes dhe lavdi e përhershme jetës e veprës së Avdyl Krasniqit”, ka shkruar Veseli në në Facebook.
Ditë më parë, ndërroi jetë një tjetër figura e shquar klerikale e Kosovës, Asllan Murati nga Mitrovica, i njohur si hoxha që bëri të mundur ruajtjen dhe rivarosjen e eshtrave të Isa Boletinit, e që gjithashtu, gjatë luftës varroste natën me të gjitha ritet, viktimat e terrorit serb. /tesheshi.com/
