Bisedimet për t’i dhënë fund konfliktit në Jemen janë ndërprerë pa arritur një marrëveshje. I dërguari i OKB-së për Jemenin, Ismail Ould Cheikh Ahmed, njoftoi një ditë më parë një pezullim njëmujor të tyre, por nuk pranoi të deklarojë që bëhet fjalë për një dështim.
Ndërprerja e bisedimeve të mbështetura nga OKB-ja erdhi pasi luftëtarët husinj dhe përkrahësit e ish-presidentit Ali Abdullah Saleh e hodhën poshtë planin e paqes të Kombeve të Bashkuara dhe shpallën emërimin e një trupe qeverisëse prej dhjetë anëtarësh për ta drejtuar Jemenin.
“Do ta lëmë sot Kuvajtin, por bisedimet e paqes për Jemenin do të vazhdojnë. Kemi garancitë dhe angazhimet nga të dy palët se janë gati të kthehen në tavolinën e negociatave,” tha i dërguari i OKB-së.
Ai do ta dënonte dhe vendimin e husinjve për të krijuar një trupë qeverisëse, “E dënojmë çdo hap të njëanshëm.”
Ndërkohë, forcat besnike të presidentit aktual, Abd-Rabbu Mansour Hadi kanë nisur një ofensivë në lindje të kryeqytetit Sana për të çliruar Nehemin, një zonë kyçe e nën kontrollin e husinjve që nga vitit 2014.
Jemeni është i mbërthyer nga kaosi dhe luftimet që nga 2012-ta, viti kur Ali Abdullah Saleh pushoi së qeni president. /tesheshi.com/
