Garantimi i sigurisë është argumenti i përdorur për ndalimin e pajisjeve elektronike në avionët që fluturojnë nga një numër vendesh të Lindje së Mesme drejt SHBA-së. Një masë e marrë nga Shtetet e Bashkuara të Amerikës dhe e pasuar nga Britania.
Ndalimi prek një numër aeroportesh, si dhe disa kompani ajrore me emër, e ka të bëjë me fluturimet e drejtpërdrejta. Lista përfshin ndalimin e pajisjeve më të mëdha se telefonat celularë, duke i lejuar këto të fundit, ashtu si dhe pajisjet elektronike mjekësore.
Al Jazeera e trajton problemin hollësisht, dhe flet për dyshime të ekspertëve të aviacionit në lidhje me shpjegimin e ndalimit në fjalë.
Çështja e konkurrencës mes kompanive ajrore të Lindjes së Mesme dhe atyre amerikane nënvizohet në analizën e Al Jazeera-s.
“Masa aktuale amerikane vjen në sfondin e… një rivaliteti të ashpër midis transportuesve të Lindjes së Mesme dhe atyre amerikanë,” lexohet në këtë analizë.
Kompanitë ajrore amerikane e kanë nxitur në të shkuarën qeverinë e tyre që të veprojë ndaj kompanive ajrore të Gjirit, që i kanë shtrirë shërbimet në SHBA dhe po marrin pjesë të konsiderueshme të tregut.
Në të njëjtën linjë, një grup avokatie që përfaqëson kompanitë ajrore amerikane u pagua së fundi për t’i bërë një letër të hapur Trump-it. I njëjti grup kishte kërkuar në shkurt të takohej me sekretarin amerikan të Shtetit në lidhje me të njëjtën çështje. Më herët, në janar, shefi i Delta-s deklaroi se ishte optimist që Trump-i do të vepronte kundër konkurrentëve të Gjirit Persik.
Ndërkohë që ndalimi nuk e shmang mbajtjen e këtyre pajisjeve elektronike nëse ndiqen mënyra të ndërmjetme fluturimi, çështja e rivalitetit bëhet akoma më e besueshme po të kihet parasysh se në këtë pjesë të globit veprojnë ca nga kompanitë e njohura ajrore, si Emirates, Turkish Airlines, Qatar Airways dhe Etihad.
Përndryshe, ambasadori turk në Uashington e quajti vendimin të papranueshëm, duke nënvizuar se aeroporti Ataturk i Stambollit kishte masa sigurie që e bënin atë shumë më të sigurt se ato të disa vendeve të tjera europiane.
Për të, ndalimi ishte jopraktik dhe i marrë apriori, pa asnjë inspektim.
“Eshtë e papranueshme të përfshihet Turqia me disa vende të tjera në këtë ndalim. Në vend të kësaj, ata mund ta kishin vizituar aeroportin, e të përgatisnin një raport vlerësimi. Ky ndalim nuk është i dobishëm, sepse njerëz të tjerë në Europë mund t’i marrin me vete në avion pajisjet elektronike. Terroristët mund t’i shfrytëzojnë po ashtu këto fluturime,” qe reagimi i tij. /tesheshi.com/
