Mali i Zi do të ketë vendin e tij në takimet formale dhe joformale të NATO-s duke i paraprirë anëtarësimit të plotë që do të ndodhë në fillim të Qershorit.
Sekretari i përgjithshëm i NATO-s, Jens Stoltenberg, konfirmoi se kryeministri malazez, Dushko Markoviq, do t’i bashkohet për herë të parë aleatëve në takimin që u mbajt sot në Bruksel.
“Parlamentet e të 28 aleatëve dhe Parlamenti i Malit të Zi kanë ratifikuar pranimin e këtij vendi në NATO. Ky është një hap përpara për Malin e Zi, për qëndrueshmërinë në Ballkanin Perëndimor dhe për vizionin tonë për një Evropë të tërë, të lirë dhe në paqe”, tha Stoltenberg.
Ndërkohë takimet e udhëheqësve të vendeve të NATO-s sot në Bruksel kanë rikonfirmuar aleancën euro-atlantike në luftë kundër terrorizmit.
Presidenti amerikan Donald Trump takoi udhëheqësit e BE-së përpara samitit me krerët e shteteve dhe qeverive të vendeve anëtare të NATO-s dhe me presidentin e Këshillit Europian, Donald Tusk.Pas takimit, Tusk tha se kanë gjetur pika të përbashkëta sa i takon dhunës së militantëve dhe Ukrainës.
“Kam ndjesinë se jemi pajtuar në shumë fusha. Pikë së pari rreth luftës kundër terrorizmit. Por, disa çështje mbeten të hapura, siç janë ndryshimet klimatike dhe tregu. Po kështu, nuk jam 100 për qind i sigurtë se kemi qëndrime të njëjta mbi Rusinë. Edhe për konfliktin ukrainas jemi në një mendje”, tha Donald Tusk, president i Këshillit të BE-së.
Temë qëndrore e axhendës mbetet edhe ajo e shpenzimeve ushtarake. Trump është ankuar se anëtarët e NATO-s kanë paguar më pak për mbrojtjen sesa 2 përqindëshi i prodhimit kombëtar./tesheshi.com/
