Misioni i KFOR-it njoftoi të enjten se një kontingjent prej 200 britanikë dhe më shumë se 130 ushtarë shtesë nga Rumania kanë mbërritur në Kosovë, për të forcuar forcat e atij misioni të NATO-s pas incidenteve të armatosura në veri të Kosovës në fund të shtatorit.
Nga Britania e Madhe kanë mbërritur 200 ushtarë të Batalionit të Parë të Regjimentit të Princeshës Mbretërore të Uellsit, të cilët iu bashkuan kontingjentit prej 400 ushtarësh britanikë që tashmë ndodhen në Kosovë.
Trupa shtesë kanë mbërritur në Kosovë për të forcuar praninë e KFOR-it në veri të Kosovës dhe për të përmirësuar patrullimin përgjatë kufirit me Serbinë, pas një sulmi ndaj policisë së Kosovës më 24 shtator dhe tensioneve të rritura në rajon.
Një pjesëtar i policisë së Kosovës dhe tre sulmues serbë u vranë më 24 shtator, pasi një grup i armatosur prej të paktën 30 personash hapën zjarr ndaj policisë, një incident që përkeqësoi marrëdhëniet edhe ashtu të dobëta ndërmjet Kosovës dhe Serbisë.
Përgjegjësinë për sulmin e mori Milan Radoiçicc, nënkryetari i atëhershëm i Listës Serbe, por duke mohuar se kishte marrë udhëzime nga Serbia, siç akuzojnë liderët e Kosovës.
Por për Prishtinën zyrtare s’ka aspak dyshim që sulmin ndaj Policisë së Kosovës në Banjskë ishte organizuar e urdhëruar nga Beogradi, me synimin final aneksimin e të gjithë veriut, sipas modelit të aneksimit të Krimesë nga Rusia.
Vendimi për dislokimin e trupave u mor me kërkesë të Komandantit Suprem të NATO-s për Evropën dhe u miratua nga aleatët në Këshillin e Atlantikut të Veriut, për të siguruar që KFOR-i të ketë fuqinë për të përmbushur mandatin e Kombeve të Bashkuara për ruajtjen e një mjedisi të sigurt dhe lirinë e lëvizjes për të gjithë njerëzit në Kosovë.
KFOR-i aktualisht ka më shumë se 4,500 ushtarë në Kosovë nga 27 vende anëtare të NATO-s dhe partnerët e tyre.
