Higuain nuk shënon në tre ndeshje radhazi, e në po kaq ndeshje Napoli nuk ia del të fitojë. Napolitanët nuk arritën mbrëmë të shfrytëzojnë mundësinë për t’u ringjitur në krye të Serisë A pas pikëve të lëna të premten nga Juventusi në barazimin me Bolonjën.
Sfida e Napolit ndaj Milanit u karakterizua nga dy tablo. Nga një në pjesën e parë, ku Napoli qe më shumë ngulmues dhe e kërkoi pandërprerë golin, e nga një në pjesën e dytë, kur u duk se qe pajtuar me barazimin.
Vendasit në “San Paolo” e nisëm më vrullshëm lojën, për t’i finalizuar sulmet me golin e Insigne-s në minutën e 39-të. Por napolitanët nuk qenë në gjendje të shkonin në pushimin mes pjesëve të fituar. Bonaventura i barazoi shifrat për Milanin një minutë para përfundimit të pjesës së parë.
Në pjesën e dytë pamë një Napoli më të lodhur, më të dorëzuar, më të nervozuar, që hera-herës edhe mund ta kishte pësuar. Golat e shënuar në 45 minutat e para vulosën dhe fatin e ndeshjes, e cila u mbyll 1-1.
Kështu Napoli është i shtrënguar të vazhdojë të jetë në ndjekje të Juventusit, ndërsa të hënën e ardhshme e pret një tjetër sfidë e vështirë në Firence, ndaj Fiorentinës. /tesheshi.com/
