Napolitanët nuk e provonin shijen e fitores prej thuajse një muaji, që nga 7 shkurti, kur mundnin 1-0 Karpin, duke u futur në një spirale krize, e paguar me çmimin e lëshimit të kryesimit të Serisë A.
Mbrëmja e së shtunës ka qenë fatlume për Napolin, teksa ka fituar 3-1 ndaj Kievos. Një takim i dominuar totalisht nga vendasit, që e patën topin në zotërim në 66 për qind të lojës, përpos statistikave të tjera që ishin të tëra në favor të tyre.
Takimi do të niste, në fakt, keq për napolitanët, që pësuan gol që në minutën e 2-të. Por goli i shënuar nga Rigoni do të asnjanësohej vetëm katër minuta më pas nga Higuain, që e tundi rrjetën për herë të 26-të në këtë kampionat.
Barazimi i shpejtë i trimëroi vendasit, që nuk do t’i ndalnin sulmet në portën kundërshtare. Chiriches e kalon në epërsi Napolin në minutën e 38-të, kurse Callejon e thellon rezultatin në pjesën e dytë.
Të barazuar me pikë me Juventusin, napolitanët shpresojnë sot që torinezët të ndalen në fushën e Atalantës.
Napoli dhe Juventusi kanë nga 61 pikë, në krye të Serisë A. /tesheshi.com/
