Dy prej krerëve më të lartë politik në Kosovë, kryeministri Isa Mustafa dhe kryekuvendari Kadri Veseli kanë përkrahur vazhdimin e mandatit të Misionit të Bashkimit Evropian për sundimin e rendit dhe ligjit (EULEX).
Kryeministri, Isa Mustafa, i cili foli në emër të qeverisë, tha se shpreh qëndrim pro vazhdimit të mandatit të misionit të EULEX-it në Kosovë.
“Si qeveri kemi nisur me kohë që të përgatitemi për vazhdimin e mandatit të këtij misioni, në shtator të vitit të kaluar kemi përgatitur të gjitha dokumentet e nevojshme, mirëpo kishte prolongim në këtë çështje. Kemi inkuadruar të gjitha palët e interesit në këtë proces, duke filluar nga presidentja, kryeministri, ministra, kryetar të gjykatave dhe vendimi ynë i përbashkët ka qenë që të vazhdohet mandati i EULEX-it”, ka thënë Mustafa.
Sipas tij, EULEX-i duhet të vazhdojë të qëndroj në Kosovë në mënyrë që të thellohet bashkëpunimi për të forcuar shtetin ligjor, luftën kundër krimit të organizuar dhe që qytetarët të ndjehen të sigurt.
“Në emër të qeverisë ftoj të votohet pro këtij misioni. Po ashtu edhe si kryetar i LDK-së ftoj të votohet pro, sepse kështu do të ndihmojmë drejtësinë në Kosovë”, theksoi Mustafa.
Veseli: Të vazhdohet mandati i EULEX-it, PDK do të votoj pro këtij misioni
Edhe kryekuvendari, Kadri Veseli ka thënë gjatë fjalimit të tij para deputetëve se qëndrimi politik i PDK-së është që të vazhdohet mandati i EULEX-it, pasi sipas tij ky është qëndrim dhe opsion edhe i qytetarëve drejt rrugës evropiane.
“Dëshiroj të flas rreth të ardhmes së EULEX-it. Sa po e ndihmon ky mision integrimin e Kosovës në rrugën drejt BE-së, sepse kemi bërë progres në procesin e liberalizimit dhe besoj se në fund të vitit qytetarët do të lëvizin lirshëm kudo në Evropë. Mirëpo kemi edhe ngecje, në fushën e ligjit. Duhet të vazhdohet mandati i këtij misioni sepse do të ndihmonte në këtë fushë.
Nuk duhet të ndahemi mes vete për këtë vendim, por çdo dështim që ndodh në drejtësi do ta marrin kosovarët të gjithë së bashku. Drejtësia, gjyqtarët e prokurorët tanë kanë aftësi dhe mundësi. Drejtësia duhet të jetë e barabartë për të gjithë”,- theksoi Veseli. /tesheshi.com/
