Kryeministri Isa Mustafa ka dështuar ta bindë komisionarin për çështje të brendshme dhe migracion, Dimitris Avramopoulos, që të suspendohet kriteri i Demarkacionit për vizat. Në vend të kësaj, zyrtari i BE-së ka kërkuar Mustafës që demarkacioni të dërgohet në Kuvend për t’u votuar.
“Komisioneri Avramopoulos ka njohur përpjekjet e Kosovës për të ratifikuar marrëveshjen për Demarkacionin e kufirit me Malin e Zi dhe e ka inkurajuar kryeministrin Mustafa dhe qeverinë e tij dhe të gjitha partitë politike që ta procedojnë sa më shpejt atë për votim në Kuvend”, thuhet në një kumtesë të përbashkët të komisionerit të BE-së dhe Mustafës.
Në njoftim më tej thuhet se dy bashkëbiseduesit kanë folur për hapat e fundit që duhet të ndërmerren për të përmbushur kërkesat e mbetura për dialogun e liberalizimit të vizave me Kosovën.
“Komisionieri Avramopulos e ka vlerësuar progresin që e ka bërë deri tani qeveria e Kosovës, përfshirë edhe regjistrin për rastet e krimit të organizuar dhe korrupsionit të nivelit të lartë”, njofton kumtesa.
Të dyja pakët janë pajtuar që ky progres duhet të jetë i qëndrueshëm dhe që numri i dënimeve të rritet.
Kujtojmë se kërkesa e Mustafës përfshinte hapjen e liberalizimit të vizave për Kosovën dhe përmbushjen e kushtit të demarkacionit “brenda një periudhe dy vjeçare”. /tesheshi.com/
