Kryeministri i Kosovës , Isa Mustafa, së bashku me ministrin e Arsimit kanë paraqitur në një konferencë për mediat përfitimet që vijnë nga anëtarësimi i Kosovës në UNESCO. Mustafa ka theksuar se nuk e kanë në mendje të heqin dorë nga anëtarësimi në UNESCO.
“Çfarë ka shumë rëndësi është se Kosova meriton dhe duhet të jetë pjesë e UNESCO-s. Kosova ka çka t’i ofrojë UNESCO-s. Mendoj se Serbia flet në mungesë të argumenteve, se e ka humbur besimin,” tha ai.
Mustafa shtoi se një nga arsyet kryesore pse Kosova duhet të anëtarësohet në UNESCO janë vlerat kulturore dhe fetare.
“Kosova ka një popullatë të re, dhe këta të rinj kanë etje për shkencë dhe kulturë. Kosova ka nevojë të jetë në UNESCO, sepse ka nevojë për partneritet, që do të ndihmonte në rritjen e paqes. Dhe ne jemi zotuar se do t’i plotësojmë të gjitha kërkesat për në UNESCO,” ka shtuar kryeministri i qeverisë së Kosovës.
Ministri i MASHT-it, Arsim Bajrami, u shpreh se anëtarësimi i Kosovës në UNESCO është një mundësi për t’i ardhur në ndihmë Kosovës në politikat arsimore dhe zhvillimore.
“Mes përfitimet që do të ketë Kosova nga UNESCO-ja janë 70 programe të ndryshme aksiome, ndihma në cilësinë e kurikulave dhe në përgatitjen e mësimdhënësve, si dhe do të ketë bashkëpunim mes nivelit të ulët, të mesëm dhe të lartë. Kosova ka nevojë për reforma, dhe me këtë merret UNESCO-ja,” tha Bajrami. /tesheshi.com/
