Pak çaste para se të niset për në Bruksel, kryeministri Mustafa ka folur për takimin që do zhvillohet sot me krerët e Serbisë. Ai ka deklaruar se takimi është i një formati të veçantë, si rrjedhojë e proceseve dhe ngjarjeve të fundit.
“Presim që ky takim të jetë fillim i fazës përfundimtare të dialogut të ndërmjetësuar nga Bashkimi Evropian dhe të mbështetur nga Shtetet e Bashkuara të Amerikës. Në këtë takim të nivelit të lartë, ku do të marrim pjesë së bashku me presidentin e Republikës, do të prezantojmë qëndrimet e institucioneve të shtetit tonë”, ka thënë kryeministri për Radio “Evropa e Lirë”.
Ndër kërkesat kryesore të Prishtinës, Mustafa ka thënë se do të jetë ajo për ndaljen e fletë-arresteve politike ndaj qytetarëve të Kosovës dhe ajo për zbardhjen e fatit të personave të pagjetur.
Ndryshe, opozita ka kundërshtuar fuqishëm vazhdimin e dialogut duke kërkuar ndërprerjen e tij pas tensionimit të situatës javëve të fundit. /tesheshi.com/
