Disa kisha te komunitetit me ngjyrë në jug të Shteteve të Bashkuara, në javët e fundit, janë djegur, disa nga zjarrvënie të qëllimshme dhe të tjera për shkak të shkaqeve natyrore si vetëtimat.
Shkatërrimi i këtyre kishave të komunitetit me ngjyrë frymëzoi nje grup të rinjsh muslimanë nga pjesë të ndryshme të vendit të zhvillojnë një fushatë për mbledhje fondesh si mënyrë për t’i rindërtuar këto kisha.
Faatimah Knight, një 23-vjecare që studion teologji nisi fushatën në LaunchGood me një grup miqsh për të mbledhur 50 mijë dollarë gjatë muajit të Ramazanit, muajit të shenjtë për muslimanët gjatë të cilit ata japin ndihma.
Qëllimi fillestar për fushatën ishte vetëm mbledhja e 10 mijë dollarëve, por grupi e tejkaloi këtë shifër në 12 orët e para. “Gati i thyen serverat e LaunchGood!”, postuan ata në faqen në Facebook.
Në faqen e fushatës, Knight shkruan: “Të gjitha shtëpitë e nderimit të Zotit janë të shenjta.., le te bashkohemi për të ndihmuar motrat dhe vëllezërit tanë në besim”.
Por, kishte edhe dicka përtej besimit që e shtyu Knight të niste mbledhjen e fondeve me katër miqtë e saj, ajo ndjente një lidhje personale me tragjeditë më të fundit.
“Mbështetja për këto kisha më preku shumë si një person me ngjyrë”, thotë ajo, një banore e Brooklyn, duke shtuar se së fundmi ka qenë sfidë të jesh zezak në Amerikë.
Më 17 Korrik, Dylann Roof vrau nëntë anëtarë të kishës Metodiste Afrikane Episkopale. Katër ditë më vonë, kishat e komunitetit afroamerikan nisën të digjen në të gjithë Jugun.
Pavarësisht se përse këto kisha u dogjën, fushata ka njohur një mbështetje të jashtëzakonshme që kur nisi në fillim të korrikut. Që tani ka mbledhur më shumë se 48 mijë dollarë dhe me pak ditë të mbetura, grupi ka besim se do të arrijnë synimin.
“Përgjigja ndaj fushatës ka qenë tepër e madhe. Ka pasur pak njerëz që ishin konfuzë përse muslimanët do të duhej të rindërtonin një kishë, por në pjesën më të madhe, njerëzit e mbështesin plotësisht”, thotë ajo.
Fushata nuk ka të bëjë vetëm me të qënit aktivist, është për të ndihmuar njerëzit, thotë Knight. “Mendoj se secili mund të jetë aktiv për dicka”. /tesheshi/
Pergatiti: Juli Prifti
