Nga Blendi Gashi
Që koalicioni qeveritar në Kosovë është vërtet prej halli dhe në hall, e ka treguar së fundi dhe muri serb në Urën e Ibrit, nga ana e veriut të Mitrovicës. Ka mjaftuar ky mur që Isa Mustafës t’i shndërohet në opozitë pikërisht aleati qeveritar, LDK-ja, eksponentë të së cilës i janë vërsulur keqaz këto ditë; e ku mes tyre po konsumohet një betejë e vërtetë verbale.
Kritika e parë Musftaës i erdhi nga një grua. Bëhet fjalë për deputeten drenicake, Sala Berisha – Shala, e cila në një intervistë dhënë për mediat deklaroi se “po të kishte PDK kryeministrin muri nuk do të ndërtohej”.
Nuk vonoi shumë dhe asaj iu bashkangjit edhe sekretari i partisë, Basri Musmurati, i cili kritikoi qasjen e kryeministrit ndaj murit në veri, për çka tha se është “as mish as peshk”.
“Mustafa është kryeministër dhe është punë e tij se a po deklarohet butë apo fort, por me u deklaru fort e mos me i dalë hiq nuk bën. Dhe në një farë mënyre ai i ka bërë disa deklarata qe nuk janë as mish as peshk”, tha për mediat Musmurati.
Ky deklarim nervozoi jo pak Mustafën dhe këshilltarin e tij, Bajram Gecaj, të cilët reaguan menjëherë.
Ky i fundit i pari iu kundërpërgjigj sekretarit të PDK-së duke thënë se: “deklarimi i kryeministrit për murin është një deklarim i një kryeministri të përgjegjshëm dhe të pjekur politikisht, i cili vepron me fuqinë e ligjit dhe të arsyes, e jo të emocionit dhe të ngutisë”.
Por Musmuratit të PDK-së i është kundërpërgjigjur personalisht edhe Mustafa, i cili përmes një statusi në Facebook, i quajti gjela të gjithë ata që, sipas tij, po tentojnë që ndërtimin e këtij muri ta përdorin për qëllime politike.
Sipas Mustafës, muri është vepër e “ndyrë”, e strukturave paralele serbe dhe Beogradit, deklaratë kjo që nuk qëndron pasi kryeministri e di që muri në fjalë është ndërtuar nga paratë e taksapaguesve kosovarë, pra nga komuna veriore e Mitrovicës.
“Muri në pjesën veriore të Mitrovicës, një vepër e ndyrë e strukturave paralele serbe dhe e Beogradit, po shfrytëzohet edhe për krekosje politike nga disa këndezë. Gjelat nuk e rrënojnë murin, ata këndojnë mbi mur. Murin e trajton dhe e rrënon ligji”, reagoi Mustafa.
Këshilltari i Kadri Veselit ironizon keq me Mustafën
Por përplasjet mes zyrtarëve të partive në koalicion vazhduan.
Hiç më pak se këshilltari i Kadri Veselit u përfshi në debat. Bëhet fjalë për Njazi Kryeziun i cili i reagoi Bajram Gecajt, derisa goditi fort kreun e LDK-së.
Kryeziu, poashtu përmes një postimi në Facebooj, tha se kryeministri jo vetëm se është i pjekur, por ai është i rreshkur e i djegur politikisht.
Për më tepër Kryeziu ironizon keq me Mustafën duke thënë se vepron sipas ligjit vetëm kur ja thyejnë paswordin e Facebookut.
“…kryeministri është jo vetëm i pjekur …por edhe i rreshkur e i djegur politikisht…
…dhe vepron me fuqinë e ligjit dhe të arsyes…vetëm kur nuk ja thyejn pasëordin në llogarinë e FB…
Përndryshe Isa është Isë emocional dhe i ngutshëm si edhe këshilltarët e tij…
Muri mbetet mur…dhe jo vetëm që simbolizon ndarjen e Mitrovicës…është vetëm fillimi i ndarjeve...”, thuhet në postimin e Kryeziut.
Pra, për këshilltarin e Veselit, kryeministri Mustafa është një politikan i harxhuar, i ngutshëm.
Këto përplasje të zyrtarëve të partisë në pushtet tregojnë më së miri se koalicioni aktual qeverisës është në teh dhe se po rri në këmbë vetëm sa për të mbajtur edhe ca pushtetin. /tesheshi.com/
