Ndërtimi i murit tek ura e Ibrit në Mitrovicë ka sjellë reagimin e opozitës në Kosovë, përmes Lëvizjës Vetëvendosje dhe AAK-së Ramush Haradinajt.
VV organizoi një konferencë për media ku për këtë çështje fajësoi krerët e shtetit. Deputeti i kësaj lëvizje, Glauk Konjufca deklaroi se ndërtimi i murit në Mitrovicë nga Goran Rakiq dhe strukturat e kontrolluara nga Serbia janë epilogu real i negociatave të Brukselit.
“Veriu i Kosovës tashmë e kemi parë që është një rajon nën kontrollin e drejtpërdrejtë të Serbisë dhe strukturave që kontrollohen nga Aleksandër Vuçiç dhe kjo situatë prej qeverisë është thënë se do të ndryshohet, përmes proçesit të negociatave të Brukselit”, ka thënë Konjufca.
Ndërsa, grupi parlamentar i AAK-së ka mbledhur nënshkrimet e nevojshme dhe ka thirrur në interpelancë kryeministrin Isa Mustafa, për të debatuar për murin e ngritur nga serbët.
Kjo parti thotë se do të kërkojë përgjegjësi të drejtpërdrejtë nga ata që kanë qenë të përfshirë në këtë projekt, duke mos përjashtuar as vetë kryeministrin Mustafa, si dhe ministren për Dialog, Edita Tahiri./tesheshi.com/
