Në seancën e së shtunës, kur u zgjodh Gramoz Ruçi në postin e kryetarit të Kuvendit, Ambasadori amerikan, Donald Lu nuk ka qenë prezent. Por sot ai ka bërë një tjetër gjest, teksa ishte i pranishëm në një nga llozhat e sallës së Parlamentit, ku ka dëgjuar fjalimin e mbajtur nga kryeministri Edi Rama.
Në momentin që kryeparlamentari Ruçi ka lexuar formulën e betimit për deputetin Vangjel Tavo, i cili mungonte në seancën konstituive të Kuvendit, Lu ka hequr kufjet.
Nuk dihet nëse ky veprim ka lidhje me moskushtimin e vëmendjes ndaj një procedure rutinë, sikundër është ajo e betimit, apo është një mesazh i qartë i qëndrimit amerikan ndaj Ruçit.
Vetë ambasadori nuk ka pranuar të bëjë komente edhe kur u pyet nga gazetarët, ndërsa përgjigjia e tij ishte e prerë: “s’mund të komentoj një veprim të tillë”.
Kandidatura e Ruçit është kontestuar fort nga Partia Demokratike, megjithëse dy deputetë të saj, i dhanë votën pro. Po kështu disa nga shoqatat e ish-të përndjekurve politikë protestuan në momentin që në Kuvend po votohej, ndërsa Ambasada amerikane ishte e vetmja që nuk kishte përfaqësues në seancën konstituive.
PD pretendon se prej vitit 2005, Ruçi nuk mund të shkojë në SHBA për shkak të problemeve dhe lidhjeve që ka me grupet kriminale dhe trafikun e drogës.
Tani mbetet për tu parë se çfarë do të ndodhë, nëse Ruçi do të mund të realizojë një vizitë zyrtare në Kongresin amerikan, ashtu sikundër ka ndodhur me drejtuesit e tjerë të Parlamentit. Deri në këtë moment, ajo që dihet është mungesa e Ambasadorit amerikan në seancën ku u votua kryeparlamentari dhe heqja e kufjeve kur Ruçi morri fjalën. /tesheshi.com/
