Nxënësit shqiptarë në disa shkolla fillore të Maqedonisë, tashmë një kohë po ballafaqohen me mungesën e librave. Këtë problem e kanë 700 nxënësit e fshatit Sllupçan të Kumanovës që po mësojnë pa libra në disa lëndë. Drejtori i shkollës fillore “Faik Konica”, ankohet se edhe ato libra që i kanë, janë me gabime drejtshkrimore.
“Lëndët me të cilat kemi më së shumti probleme janë lëndët e inovacionit, që nuk kemi libër për nxënësit. Në librin e muzikës për ciklet e larta, edhe atje kemi probleme. Arsimtarët, prindërit dhe nxënësit nuk pajtohen me këtë libër. Mund të themi se kemi tekstet por nuk përshtaten për nxënësit shqiptarë”, tha Negaip Avdija.
Mësuesi i kimisë, Vebi Jahiu thekson se në librin që ai përdor ka gabime të shumta në përkthim dhe përshtatje.
“Kanë edhe disa mangësi. Së pari kanë vërejtur disa gabime në përkthim. Nuk e di si janë versionet në gjuhën angleze dhe në gjuhën maqedonase, por mendoj se në të ardhmen librat duhet t’i përkthejnë profesionist që e njohin kiminë por edhe gjuhën nga e cila përkthehen”, tha Vebi Jahiu
Me këtë problem po ballafaqohen edhe shkolla të tjera të rajonit, por edhe më gjerë. Zëvendësdrejtori i shkollës fillore “Kultura” nga fshati Mateç, Ibrahim Bakiu thotë se edhe ata kanë probleme të ngjashme, ndërsa në mungesë të zgjidhjes, thotë se mësimdhënësit mezi mbajnë orët mësimore.
“Mësimdhënësit me angazhimin e vet, duke u angazhuar nëpër faqe të ndryshme të internetit mundohen që sado pak ta zbusin këtë mungesë dhe përmes fotokopjimit të materialeve, ose teknika të ndryshme si diktimi, mundohen që sado pak të arrijnë që deri diku t’u japin nxënësve dijen që kanë nevojë ta marrin”, tha Mateç.
Nga Ministria e Arsimit shfajësohen se problemi është shkaktuar për të shkak të problemeve të krijuara më shtëpitë botuese dhe ato që bëjnë shpërndarjen e librave.
M. Hasani – /tesheshi.com/
