Nga Ross Clark
Pse Zyra e Statistikave Kombëtare (ONS) nuk dëshiron që ne ta dimë se Muhammed (Mohammed) është emri më popullor i djemve në Angli dhe Uells? Ditë më parë ajo bëri të njohur studimin vjetor mbi dhjetë emrat më të përdorur për fëmijët. Në 2014-ën, raportoi ajo, emrat më popullorë të djemve ishin Oliver, Xhek (Jack) dhe Herri (Harry). Kjo bie ndesh disi me një studim të ngjashëm dhjetorin e shkuar nga faqja elektronike BabyCentre, që shpallte se emri më popullor i djemve ishte tani Muhammed (Mohammed).
Kur ai studim u raportua në Daily Mail, kërcyen një sërë faqesh elektronike “faktshqyrtuese” të së majtës, që e denoncuan studimin si një abuzim me statistikat. Jo vetëm që shifrat ishin bazuar veç në dhënësit e përgjigjeve për një faqe të vetme elektronike, gjë që është e vërtetë, por te ato ishte arritur me mënyra të “dyshimta”, duke mbledhur drejtshkrimet e ndryshme të emrit Mohammed, e duke i shpërfillur ndërkaq drejtshkrimet e ndryshme të emrave të tjerë. Sido që Mail-i e raportoi studimin thjesht si çështje interesi, siç bëri në fakt Guardian-i, akuza ishte e qartë: tabloidet po përpiqeshin përsëri të nxisnin frikën e Britanisë së përmbytur nga muslimanët.
Por kur i hidhni sytë përtej komunikatës së shtypit të Zyrës së Statistikave Kombëtare, e cila nuk e përmend emrin Muhammed (Mohammed) përveç zbulimit se ai variant drejtshkrimi është emri më popullor në Londër, ju gjeni një histori ndryshe. Shqyrtoni pasqyrën në faqen elektronike të ONS-së, dhe shifrat e papërpunuara e përforcojnë studimin e BabyCentre: Muhammed (Mohammed) është vërtet emri më popullor. Numrat e përgjithshëm që ajo jep janë: Muhammad 3588, Mohammed 2536, Mohammad 1116, që në tërësi janë 7240. Në dallim nga kjo, kishte 6649 Oliverë (Oliver), 5804 Xhekë (Jack) dhe 5379 Herri (Harry). Ju mund të shkoni në 7555 nëse u shtoni Oliverëve (Oliver) 906 emrat Ollie. Por Oliver dhe Ollie nuk janë realisht i njëjti emër. Ky i fundit është një version i shkurtuar, i bastarduar, i të parit. Në anën tjetër, Muhammad, Mohammed dhe Mohammad janë transliterime të të njëjtit emër, e janë shqiptuar njëlloj. Nuk ka emër tjetër ku drejtshkrimet e ndryshme thuajse e sfidojnë atë.
ONS-ja qe mjaft e lumtur dhjetë vite më parë të deklaronte në komunikatën e saj të shtypit se Mohammed – atëherë me sa duket drejtshkrimi i parapëlqyer – kishte hyrë në njëzet emrat më popullorë të foshnjeve. Por në këtë çast ngjan se ka ngurruar të na njoftojë se ai është tani emri më popullor i djemve në Angli dhe Uells.
Pasja e shumë fëmijëve me emrat Muhammad, Mohammed dhe Mohammad që sillen rrotull nuk na kthen në një vend islam, sigurisht, sepse emrat islamë janë lehtësisht të lënë në hije në numër nga emrat kristianë në tërësi. Po nëse agjencia jonë kombëtare e statistikave publikon një listë të emrave popullorë, nuk e kuptoj pse nuk do të na lërë ta mësojmë tablonë e vërtetë, që, në fund të fundit, është sigurisht me po aq interes për multikulturalistët sa ç’është për islamofobët.
Përktheu: Bujar M. Hoxha – tesheshi.com
