Nga Shkëlzen Rrecaj
Është 70 vjeç, por nuk ka ndërmend të ndalojë. Ndërsa shumica e moshatarëve të tij kanë zënë një tavolinë apo bëjnë një xhiro me hapa të numëruar duke ia çarë hallet njëri-tjetrit, Muhamet Rama vazhdon të mbush vitrinat me trofetë duke vrapuar. Madje për të viti 2015 është viti më i suksesshëm në karrierën e tij sportive.
“Kam lindur në vitin 1945 dhe jam moshatar i legjendës së futbollit të Gjermanisë, Franz Beckenbauer”, thotë z. Rama, i cili në mbretëreshën e sporteve ka hyrë rastësisht dhe atë shumë vonë, në vitin 2002. Pasi që doli i pari në gjysmëmaratonën e Prishtinës në kategorinë për veteranë, ai filloi ta marrë më seriozisht vrapimin dhe kështu ky aktivitet iu bë pjesë e jetës, në një kohë kur për shumicën bashkëmoshatarëve të tij ai është luks. Që atëherë ai rregullisht merr pjesë në secilën garë kombëtare dhe rajonale dhe kur ka mundësi edhe në ato ndërkombëtare.
Rrëfimin e tij e nis kështu: “Jam 13 vjet me radhë kampion i Kosovës, 9 herë jam shpallur kampion i Ballkanit, tri herë ka thyer rekordin, dy herë në Izmir dhe një herë në Hungari si dhe jam kampion i Evropës në Itali në 42 km.” Këto janë vetëm disa nga sukseset e shumta të 70-vjeçarit Muhamet Rama.
Të gjithë këta tituj ai i ka fituar në Sarandë, Tiranë, Shkup, Podgoricë, e gjetiu. Ai po ashtu njihet si vrapuesi i vetëm deri më tani i Rrugës së Kombit. Z. Rama i kishte vrapuar 280 km me rastin e përurimit të saj për një ditë e gjysmë. Por kur jemi te Shqipëria, ai thotë se shteti amë i ka borxh. “Pasi jam shpallur kampion i Ballkanit disa herë me Shqipërinë, kam marr pjesë në garën ‘Nëna Terezë’ dhe atë të organizuar për 100-vjetorin e Pavarësisë ku kam dalë i treti për seniorë dhe përkundër se më janë premtuar lekë, unë nuk kam marr asgjë deri më tani”, bën me dije ai.
Përveç në shtigje të gjata, z. Rama njihet po ashtu edhe në ato më të shkurtra. Edhe aty ai ka një mori suksesesh, prej të cilave veçon mitingun e Izmirit të Turqisë ku ka fituar tri herë dhe ka thyer rekordet në 800 dhe 1500 m. Po ashtu në Stamboll ka fituar katër herë në 800 dhe 5000 m.
Në Itali është shpallur kampion Evrope për veteranë. Në Hungari ka thyer rekordet në 1500 dhe 800 m, ndërsa në Slloveni në 5000 dhe 3000 m. Në karrierën e tij trembëdhjetëvjeçare ai ka diku rreth 100 medalje dhe 50 kupa të fituara. Edhe pse ka arritur mjaftueshëm në kontinentin e vjetër, ëndrra e tij mbetet pjesëmarrja në ndonjë maratonë në SHBA. Ai thekson se institucionet e vendit i kanë premtuar se do ta ndihmojnë në realizimin e kësaj ëndrre, por deri më tani asgjë nuk është bërë në këtë drejtim.
“Rezultatet që unë i kam arritur, vështirë se mund të gjenden te ndonjë sportist. Nuk kam dëgjuar ende për garues që është 13 vjet pa humbje, por mua Zoti ma ka dhënë fuqinë dhe për këtë i kam të gjitha këto suksese. Në muajin Ramazan stërvitem duke agjëruar dhe nuk ndiej aspak lodhje. Fuqia e Allahut është e madhe”, rrëfen ai.
Sipas tij një sportist i suksesshëm duhet patur tri komponente. “Fillimisht duhet të kesh talent, e pastaj vijnë kushtet dhe stërvitjet. Nëse ke talent e kushte jo, atëherë e ke shumë të vështirë për të arritur sukses, por edhe e kundërta. Në rastin tim ekziston talenti, por jo edhe kushtet. Megjithatë, me ndihmën e Zotit ia kam dalur”, shprehet z. Rama, i cili ende vazhdon të stërvitet në parqet e tij të preferuara, atë të Gërmisë dhe Taukbahçes.
Por z. Rama ka një pasion më të madh se atletikën. Sporti i tij i pëlqyer mbetet futbolli, për të cilin thotë se nuk lë ndeshje t’i ikë. Ai është enciklopedi e gjallë e këtij sporti, duke filluar nga Kupat e Botës, Europianët, etj. Ai me shumë kujdes i ruan akoma gazetat dhe botimet sportive që nga viti 1965.
Lidhur me të ardhmen, z. Rama thotë se nuk e ka ndërmend të pensionohet dhe e ndien se akoma mund t’i japë këtij sporti. “Dua të merrem me sport derisa të kem jetë dhe vetëm ndonjë lëndim mund t’më detyrojë të tërhiqem. Po të kisha mbështetjen e ndonjë kompanie me siguri se do t’i sillja vendit edhe më shumë rezultate, por ja që ky është realiteti ynë.” Këtyre të fundit ai iu bënë apel që të kontribuojnë në sponsorizimin e aktiviteteve sportive pasi që ato do ta afirmojnë edhe me shumë Kosovën në arenën ndërkombëtare. Sipas tij këto janë investime që iu kthehen atyre shumëfish. /tesheshi.com/
