Fitorja 0-1 e Mançester Junajtedit në transfertë ndaj Selta Vigos i çon anglezët më të qetë në sfidën e pas një jave në “Old Trafford”.
Së bashku me Ajaksin, që të mërkurën mundi 4-1 Olimpikun e Lionit, Mançesteri është pranë finales së Ligës së Europës së 24 majit.
Suksesi ndaj Selta Vigos u arrit me një gol të shënuar nga Rashford në minutën e 67-të, pas ekzekutimit të një goditje dënimi jashtë zonës.
E për këtë, Rashford ka marrë përgëzimet e trajnerit portugez, i pakursyer në lavdërimet për të riun e talentuar.
“Ai është një djalosh 19-vjeçar në dashuri me futbollin.”
“Eshtë mendësia e tij. Ai punon, punon, punon, dhe është shumë i pjekur. Ta harrojmë moshën, sepse ajo nuk ka rëndësi. Rëndësi ka cilësia,” ka thënë “Special One” pas gjysmëfinales së mbrëmshme.
“Ai qëndron gjysmë ore pas stërvitjes për të praktikuar goditjet e lira dhe pret mundësinë,” është shprehur Mourinho gjithnjë për Marcus Rashford-in.
E sa për ndeshjen në tërësi, Mourinho ka folur kësisoj: “Jam shumë i kënaqur me paraqitjen, por jo me rezultatin. Në pjesën e parë duhet të kishim shënuar tre gola, apo më së paku dy.”
Jashtë katërshes së parë në klasifikimin e Premier League-s, fitimi i Ligës së Europës do t’i mundësonte Mançesterit Junajtedit pjesëmarrjen në Champions League sezonin e ardhshëm. /tesheshi.com/
