Superkupa e Anglisë i ka shkuar për herë të 21-të Mançester Junajtedit, që mban rekordin e fitimit të këtij trofeu.
Finalja e Superkupës ka vënë përballë këtë pasdite në “Wembley” Lestër Sitin, skuadrën kampione të Premier League-s, dhe Mançester Junajtedin, fituesin e FA Cup-it.
Lestëri e ka fituar vetëm një herë superkupën, apo ndryshe, Community Shield-in, e këtë e ka bërë më 1971, 45 vite më parë.
Barazpesha e ndeshjes së sotme është prishur në minutën e 32-të, kur Lingard ka shënuar në portën e Lestërit.
Vardy, golashënuesi më i mirë i Lestërit në sezonin e shkuar, që më herët refuzoi një ofertë të Arsenalit, barazoi për kampionët e Anglisë në minutën e 52-të.
Por Zlatan Ibrahimovic nuk ka vonuar të tregojë se është blerja më e mirë e Mançester Junajtedit. Kur ndeshja po shkonte drejt një barazimi 1-1, ka qenë suedezi që ka rikthyer epërsinë për “djajtë e kuq” në minutën e 83-të.
Rezultati 2-1 për Mançester Junatedin nuk ka ndryshuar më, për t’i sjellë skuadrës së teknikut Mourinho të parin trofe sezonal.
Në fund vijnë dhe fjalët entuziaste të Ibrahimovic-it pas fitores: “Ndeshja e parë zyrtare; ne luajtëm për një trofe, e fituam. Ky është trofeu im i 31-të. Jam shumë i lumtur. Shpresoj se mund të fitoj shumë më tepër se këtë. Ekipi është fantastik. Eshtë mbase klubi më i madh ku kam luajtur.” /tesheshi.com/
