Një mot i furtunshëm për rreth 30 minuta mbrëmjen e së hënës në Sarandë, i morri jetën një 22-vjeçari. Armando Kazma ishte ndër të rinjtë që u gjend në një kalçeto në hyrje të qytetit në kohën kur ia behu një furtunë “e papërmbajtshme” me rreshje të dendura shiu, gjë të cilën nuk e përballoi dot struktura e kalçetos. Ajo ra mbi trupin e të riut sarandiot, duke i marrë jetën më pas edhe pse u dërgua me urgjencë në spital.
Deputetja demokrate e Sarandës Ina Zhupa ndau dhimbjen e saj njerëzore, duke postuar një foto me të ndjerin, pasi ky i fundit ishte dhe aktivist politik demokrat.
“Nuk dua ta besoj, nuk doja ta shkruaja kurrë këtë status, dhimbje pafund. Një nga djemtë më të mire të Sarandës, një djalë i zoti, një djalë i qeshur, punëtor, i pari në fushatën elektorale në krye të punëve, i fundit u largua deri sa numëroi votën e fundit.
Një djalë i shkolluar, një djalë i urtë, nga një familje e jashtëzakonshme. Edhe të gjitha këto janë pak për të përshkruar Armandon që sapo mora vesh që u nda nga jeta në moshën 22-vjeçare, aksidentalisht nga një shtyllë kalceto që u rrëzua nga stuhia me shi.
O Zot jepi forcë familjes së tij për këtë dhimbje të papërshkrueshme, jepi force njerëzve të afërt.
I paharruar Armando, lotët nuk do thahen kurrë për ty. Parajsa ka engjëlli e vet, ne kemi dhimbjen që po na plas zemrën.
Do të mbaj mend të qeshur gjithmonë”, shkroi Zhupa. /tesheshi.PD com/
