Moti i keq i ditës së sotme ka paraqitur vështirësi dhe problematika në qytete të ndryshme të vendit. Situata prej motit të keq paraqitet mjaft problematike në shumë zona të kryeqytetit, por në rrethe problematika është më e madhe. Shirat e rëna gjatë natës kanë bërë që lumi në Fushë-Krujë të dalë nga shtrati.
Në këtë qytet, banesa të shumta janë përfshirë nga uji, lartësia e të cilit ka arritur deri në një metër.
Reshjet e shiut kanë shkaktuar probleme dhe në aksin rrugor Burrel-Milot. Ndërsa në Shkopet ka pasur rrëshqitje të vazhdueshme inertesh.
Në Fier se lumi Gjanica ka dalë nga shtrati dhe ka përmbytur disa banesa. Situatë kritike thuhet se është në lagjen “1 Maji”.
Në Vlorë një pjesë e qytetit por dhe në Orikum, Dukat, si dhe disa fshatra të lumit të Vlorës, Mifol, fshati Fitore dhe komuna Novoselë raportohet se janë pa energji elektrike.
Në Durrës shirat e rrëmbyer dhe me erëra të forta kanë ndërprerë energjinë elektrike për Sukthin, Thumanën, Gjirin e Lalzit, Xhafzotajn, Spitallën, Dervenën, Borizanin dhe zonën e Shkëmbit të Kavajës.
Moti i keq ka prekur edhe veriun e vendit, ku pa energji elektrike që prej mbrëmjes së të shtunës kanë mbetur Puka, Kukësi, Hasi dhe Tropoja.
Policia e Tiranës informon se për shkak të reshjeve të orëve të fundit, disa segmente rrugore kanë krijuar probleme dhe po vështirësojnë së tepërmi lëvizjen dhe qarkullimin e automjeteve.
Segmentet të cilat kanë probleme janë: autostrada Durrës- Tiranë; Blloku “Don Bosko”, “Komuna e Parisit”, “Pallati me Shigjeta”; “Qendër Kamëz”, “Qendër Kombinat” dhe rruga e “”Qelqit”.
Ndërsa qarkullimi në segmentet e tjera është normal por këshillohen drejtuesit e automjeteve të kufizojnë lëvizjet dhe të tregohen të kujdesshëm dhe mirëkuptues ndaj situatës./tesheshi.com/
