Edhe pse mediat izraelite njoftuan mbrëmë se ministri i Sigurisë Kombëtare Itamar Ben-Gvir shtyu vizitën e diskutueshme në kompleksin e Xhamisë Al-Aksa në Al-Quds Lindore (Jerusalem), ai përsëri hyri në Al-Aksa këtë mëngjes i shoqëruar nga policia. raporton Anadolu Agency (AA).
E djathti ekstrem Ben-Gvir, i cili hyri në Aksa në orët e hershme të mëngjesit nën mbrojtjen e policisë izraelite, është ministri i parë izraelit në detyrë që hyn në këtë xhami në pesë vjet.
Politikani izraelit e bëri këtë lëvizje, e cila shkeli status quo-në e xhamisë Al-Aksa, në ditën e 10 të muajit “Tevet” (Asara BeTevet) sipas kalendarit hebraik.
Pala palestineze dënoi inkursionin e Ben-Gvir në Al-Aksa, duke e quajtur aktin “një sulm ndaj Al-Aksa” dhe e mbajti kryeministrin izraelit Benjamin Netanyahu përgjegjës për tensionin.
Në një deklaratë të Ministrisë së Punëve të Jashtme Palestineze thuhet se ky është një “provokim i paprecedentë” dhe se është “një kërcënim serioz që do të çojë në një përshkallëzim të konfliktit, duke injoruar kërkesat për ndalimin e konfliktit dhe duke hapur rrugën për bastisje të mëtejshme nga kolonët hebrenj dhe shkeljet ndaj xhamisë Al-Aksa”.
“Ministria e konsideron Netanyahun përgjegjës për këtë sulm të hapur ndaj xhamisë Al-Aksa dhe do të vazhdojë ta bëjë këtë në të gjitha nivelet në koordinim me Mbretërinë vëllazërore Hashemite të Jordanisë”, thuhet në deklaratë.
Njoftimi i mëhershëm i Ben-Gvir se ai do të “vizitonte” Aksa u ndesh me një reagim dhe përshkallëzim të tensioneve në territoret e pushtuara palestineze.
Ben-Gvir ka pikëpamje të ekstremit të djathtë për palestinezët dhe bën thirrje për zhvendosjen e tyre. Në disa raste, ai iu bashkua kolonëve izraelitë në sulmin ndaj kompleksit të xhamisë Al-Aksa.
Ish-kryeministri izraelit Yair Lapid dënoi të hënën vizitën e planifikuar të ministrit të Sigurisë Kombëtare të Izraelit, Itamar Ben-Gvir në kompleksin e Xhamisë Al-Aksa, duke e quajtur atë një “provokim të qëllimshëm”.
Në nëntor të vitit të kaluar, presidenti izraelit Isaac Herzog paralajmëroi në një regjistrim audio të zbuluar se “e gjithë bota është e shqetësuar” për pikëpamjet ekstremiste të Ben-Gvir.
Al-Aksa është vendi i tretë më i shenjtë për myslimanët, ndërsa hebrenjtë e quajnë këtë zonë “Kodra e Tempullit”, duke pretenduar se në kohët e lashta në vend kishte dy tempuj hebrenj.
Që nga viti 2003, Izraeli ka lejuar kolonët izraelitë të hyjnë në kompleks pothuajse çdo ditë, përveç të premteve dhe të shtunave.
Gjatë luftës arabo-izraelite në vitin 1967, Izraeli pushtoi Al-Kudsin Lindor, ku ndodhet edhe Al-Aksa, dhe në vitin 1980 aneksoi të gjithë qytetin, të cilin komuniteti ndërkombëtar nuk e ka njohur kurrë. /tesheshi.com/
