Mosshlyerja e detyrimeve që lidhen me sigurimet shoqërore nuk është më një problem vetëm për bizneset private, por edhe për disa nga institucionet shtetërore.
Drejtoria e Përgjithshme e Tatimeve ka përfshirë në listën e zezë të “borxhlinjve”, krahas 18 mijë subjekteve private, edhe 13 bashki, të cilat nga 2012 e deri më tani, u janë shmangur detyrimeve.
Duke qenë se pjesa më e madhe e borxhit të krijuar prej tyre ka të bëjë me mosderdhjen e sigurimeve shoqërore, atëherë edhe impakti social mbetet një çështje e mprehtë dhe me pasojë direkte në skemën e pensioneve. Qindra punonjës në këto institucione, sot gjenden përballë faktit se kanë punuar në të zezë. Vitet e humbura janë para së gjithash mungesë kontributesh, që do të reflektohet në momentin e përllogaritjes së pensioneve.
Në mesin e bashkive që janë klasifikuar si debitore bëjnë pjesë Himara, Përmeti, Tepelena, Kavaja dhe Kruja. Referuar listës së publikuar nga tatimet, ajo që bie në sy është viti i krijimit të këtyre detyrimeve. Një pjesë prej njësive të qeverisjes vendore janë të zhytura në borxh që prej 2015-s. Por ka edhe nga ato që janë më të hershme, konkretisht, Bashkia Poliçan, e cila rezulton me detyrime të pashlyera që prej 2012-s. Ndërkohë, ato të cilat e kanë filluar këtë histori informaliteti në 2017, janë bashkia e Himarës dhe Krujës.
Sipas të dhënave të drejtorisë së përgjithshme të tatimeve, 9 prej bashkive janë klasifikuar me statusin e debitorit, fill pas aplikimit të ndarjes së re territoriale, shkruan Panorama.
Nga institucionet shtetërore shihet se ka një mungesë korrektese për pagat e sigurimeve nga ndërmarrjet e ujësjellësit, bashkitë dhe disa agjenci rajonale. Administrata Tatimore nuk ka bërë publike faturën që kanë në ngarkim secili prej këtyre institucioneve, por ka paralajmëruar mbledhje me forcë të çdo qindarke nga ky detyrim.
Më herët, Ministria e Financës ka miratuar një plan veprimi, i cili i detyron bashkitë të mbyllin këtë kapitull deri në fund të vitit 2018. Vitet e fundit kanë sjellë një përkeqësim të borxhit tatimor.
Mbi 100 milionë euro është fatura e llogaritur deri në fund të 2016, pikërisht prej mospagesës së kontributeve për trupën e punonjësve. Të dhënat janë raportuar nga Drejtoria e Tatimeve, e cila, në mënyrë të vazhdueshme, ka tërhequr vëmendjen për këto borxhe që janë një njollë e zezë për bashkitë dhe jo vetëm.
Një ditë më parë, ish-kryeministri Sali Berisha i bëri thirrje Prokurorisë të nisë hetimet në lidhje me atë çka është raportuar. /tesheshi.com/
