Vladimir Putin refuzoi të angazhohej në diplomacinë “dhëmbë për dhëmbë” pasi Shtetet e Bashkuara dëbuan 35 diplomatë rusë për shkak të grindjes mes dy shteteve sa i takon përfshirjes kibernetike të Moskës në zgjedhjet presidenciale. Vetëm disa orë pasi ministri i Jashtëm rus, Sergei Lavrov rekomandoi dëbimin e 35 diplomatëve amerikanë nga Rusia, presidenti Putin tha se vendi i tij kishte çdo të drejtë ta ndërmerrte një masë të tillë por se ai nuk do të binte “në këtë nivel të diplomacisë së papërgjegjshme”.
Ai tha se qeveria e tij do të priste të shihte sesi do të zhvilloheshin marrëdhëniet me presidentin në ardhje, Donald Trump, që më pas e përshkroi lëvizjen e liderit rus si “shumë të mençur”.
Putin, i vetëdijshëm se Trump do të jetë në Shtëpinë e Bardhë në më pak se tre javë, përdori edhe një tonalitet ngacmues ndërsa uroi Barak Obamën dhe familjen e tij për vitin e ri. Ai ftoi të gjithë fëmijët e diplomatëve amerikanë në Rusi për festimet e Vitit të Ri në Kremlin.
Rusia planifikon të dërgojë një avion special qeveritar drejt Shteteve të Bashkuara për të marrë diplomatët e prekur nga dëbimi. Burime thanë se diplomatët nuk po arrijnë të gjejnë bileta avionic për shkak të prenotimeve të plota për festat.
Dëbimet e së enjtes janë më të fundit në një listë të gjatë incidentesh diplomatike midis Rusisë dhe Shteteve të Bashkuara që në vitin 2000.
Tetor 2016
Uashingtoni depoziton ankesë pranë Moskës zyrtare pasi dy diplomatëve amerikanë iu hodh drogë në pije ndërsa merrnin pjesë në një konventë kundër korrupsionit në Shën Petërsburg.
Korrik 2016
Dy zyrtarë rusë u dënuan në hakmarrje për atë që Departamenti amerikan i Shtetit tha se ishte një sulm mbi diplomatët amerikanë në Moskë nga një officer i policisë ruse. Rusia në këmbim dëboi dy qytetarë amerikanë, përfshirë personin që kreu sulmin.
Janar 2015
Shtetet e Bashkuara të Amerikës pretenduan se kishin shkatërruar një organizatë spiunazhi ruse me bazë në Nju Jork. Dy të akuzuarit, me imunitet diplomatic, u larguan nga Shtetet e Bashkuara ndërsa një i tretë u arrestua.
Mars 2014
SHBA dhe liderët e tjerë botërore vendosën të përjashtojnë Rusinë nga G8 pas aneksimit të Krimesë. Ministria e Jashtme ruse tha se vendi nuk e sheh këtë si një fatkeqësi të madhe.
Maj 2013
Rusia dëbon një punonjës të ambasadës amerikane, Ryan Fogle, pas disa ditësh që e nxorri në një paradë televizive me pretendimin se ishte spiun i CIA-s që ishte përpjekur të rekrutonte një oficer të kundër-terrorizmit rus.
Janar 2013
Një oficer anonim tregoi se katër muaj më herët, në në janar 2013, Moska kishte dëbuar një spiun të dyshuar që punonte i mbuluar në ambasadën amerikane.
Qershor 2010
Dhjetë njerëz që jetonin në verilindje të Shteteve të Bashkuara u arrestuan dhe u akuzuan si spiunë “të fjetur” që kishin marrë identitete secrete dhe detyra afatgjata nga agjencitë e inteligjencës ruse. Mes tyre ishte Anna Chapman.
Mars 2001
Uashingtoni dëbon 50 diplomatë rusë pas arrestimit të një oficeri të inteligjencës në Virxhinia, që më pas u akuzua dhe u dënua si spiun i dyfishtë për Moskën. Moska u hakmorr duke dëbyar një numër të njëjtë qytetarësh amerikanë.
Përgatiti: Juli Prifti – /tesheshi.com/
