Moska ka shpërthyer sërish ndaj Malit të Zi por edhe ndaj Serbisë, duke marrë shkas nga vdekja e dy diplomatëve serbë në Libi, të cilët, sipas Beogradit janë vrarë nga një avion amerikan.
Zëdhënësja e Ministrisë së Mbrojtjes së Rusisë, Maria Zakharova, tha se elita malazeze dhe ajo serbe kanë sindromën e Stokholmit që dashurohen me dhunuesin.
“Ju e dini, kemi një lloj të veçantë të poshtërimit, pra po afrohen me ata që dikur i kanë bombarduar. Jemi fiks në situatën kur viktima afrohet me torturuesin e tij, pra Sindromën e Stokholmit. Ju e dini që njerëzit nuk i kanë harruar ende bombardimet”, tha Zakharova.
Sipas saj, elita politike në Mal të Zi është nën presion nga Perëndimi.
Moska ka kërkuar edhe një herë me forcë se çështja e nëse Mali i Zi duhet të bëhet anëtare e NATO-s duhet të vendoset me referendum. Ajo deklaroi se në këtë rast Aleanca Perëndimore ka shpejtuar procedurat.
Më 2 dhjetor të vitit të kaluar, NATO ftoi Malin e Zi për t’u bashkuar me Aleancën, dhe të nesërmen Podgorica pranoi ftesën.
Një nga mediat e rëndësishme të Moskës, “Sputnik” në një analizë të sajën theksonte se NATO ka bombarduar “një vend të vogël të Ballkanit Perëndimor 17 vjet më parë, kur Mali i Zi dhe Serbia ka qenë pjesë e Jugosllavisë”.
Ndërkaq, Zakharova “vuri gishtin në plagë” edhe ndaj Aleksandër Vuçiçit, kur përmendi vdekjen e dy diplomatëve serbë në Libi.
Zyrtarja e ministrisë së Mbrojtjes, Zaharova tha se vdekja e dy zyrtarëve të ambasadës serbe në Libi ndodh në sfondin e përpjekjeve të Perëndimit për ta tërhequr Serbinë në NATO duke e dhunuar dhe imponuar. Pra po përsëritet “sindroma e Stockholmit”./tesheshi.com/
