Japonia dhe Rusia nuk nënshkruan kurrë një traktat paqeje që do t’i jepte fund zyrtarisht luftës, për shkak të një mosmarrëveshjeje mbi një grup ishujsh midis Hokkaido të Japonisë dhe Kamchatka të Rusisë.
Në ceremoninë e “Ditës së Territoreve Veriore” të mbajtur çdo 7 shkurt në Japoni, qeveria japoneze dhe shoqatat qytetare kritikuan sot Rusinë për “pushtimin e paligjshëm” të Kurileve të Jugut, një grup ishujsh midis Hokkaido-s së Japonisë dhe Kamchatkës të Rusisë që Japonia i quan “Territoret Veriore”.
“Është absolutisht e papranueshme që territoret veriore të mos jenë kthyer as 77 vjet pas pushtimit ilegal sovjetik”, thuhet në deklaratën që u miratua në “Ditën e Territoreve Veriore” të këtij viti.
Kryeministri japonez Fumio Kishida deklaroi se qeveria ruan qëndrimin e saj “se do të kërkojë një zgjidhje për mosmarrëveshjen territoriale me Rusinë dhe do të nënshkruajë një traktat paqeje të pasluftës, pavarësisht gjendjes së keqe aktuale të marrëdhënieve dypalëshe midis Rusisë dhe Japonisë”.
Deklaratat nga tubimet e 2019 dhe 2020 nuk përdorën termin “pushtim i paligjshëm”, me sa duket për të shmangur përshkallëzimin e tensioneve midis Tokios dhe Moskës, por retorika e Japonisë është ngurtësuar gjatë dy viteve të fundit.
Lufta nuk mbaroi kurrë zyrtarisht
Japonia pretendon se Bashkimi Sovjetik pushtoi ilegalisht ishujt Etorofu, Kunashiri, Shikotan dhe grupin e ishujve Habonai menjëherë pas kapitullimit të Japonisë në Luftën e Dytë Botërore në 1945.
Rusia pretendon se pushtimi i këtyre ishujve ishte legjitim.
Për shkak të kësaj mosmarrëveshjeje territoriale, Japonia dhe Rusia nuk nënshkruan kurrë një traktat paqeje që do t’i jepte fund zyrtarisht luftës.
Marrëdhëniet midis Japonisë dhe Rusisë u përkeqësuan më tej pas 24 shkurtit të vitit të kaluar, kur Rusia nisi një sulm ndaj Ukrainës dhe Japonia iu bashkua sanksioneve perëndimore kundër Moskës. /tesheshi.com/
