Qeveria ka ndjekur të njëjtën praktikë me Bashkinë e Shkodrës, siç me të tjerat pas 30 Qershorit, me ato që shpallën rebelimin, duke thënë se nuk do lironin zyrat: ka ndëprerë financimin. Pra, të qënit pa rroga e pa asnjë të drejtë vendimarrjeje, i bëri që të dorëzoheshin një e nga një.
E tani, e fundit “kështjellë” e opozitës është Shkodra, rezistenca e së cilës është ushqyer dhe nga rasti i Valdrin Pjetrit, kryebashkiakut të ri socialist që s’u bë dot i tillë për shkak të një njolle penale nga e kaluara.
Prej së martës, Ministria e Financave ka ndërprerë financimin e bashkisë që mbahet ende nga Voltana Ademi, duke e argumentuar këtë me faktin se kushtetueshmërisht asaj i ka përfunduar mandati.
Ndërsa PD-ja lokale e intepreton kështu këtë zhvillim: Ministria e Financave dhe Ekonomisë, Drejtoria e Përgjithshme e Thesarit përmes degës në Shkodër ka bllokuar funksionimin normal të Bashkisë Shkodër,duke bllokuar kështu fondet për shërbime e investime.
Edi Rama në mënyrë të drejtpërdrejtë po i bllokon shërbimet qytetarëve të Shkodrës. Qytetarët e Shkodrës nuk të kanë asnjë borxh. Ashtu si të gjithë qytetarët e Shqipërisë ato paguajnë taksat dhe për këtë meritojnë shërbimet për të cilat ato vetë po paguajnë”, shprehet dega lokale e PD-së.
Në fakt, rezistenca, ajo që u paralajmërua por nuk u zbatua në asnjë prej bashkive demokrate, e që po tenton të bëhet në Shkodër, vlen vetëm si politike. Nga pikëpamja administrative nuk është aspak e mundur të mbahet, pasi zëri kryesor, ai i financave, përkthyer dhe si rroga për stafin, bllokohet menjëherë nga qeveria me argument kushtetues “fundin e mandatit”. /tesheshi.com/
