Shprehja “mos luaj me zjarrin”, është bërë tashmë pjesë e zakonshme e fjalorit politik të zhvillimeve në Maqedoni.
Së fundi, atë e artikuloi edhe eurokomisioneri Hahn, si një mesazh përcjellë pushtetit aktual të Shkupit që t’i hapë rrugë formimit të qeverisë së re.
Dhe po të njëjtin mesazh e përcjell dhe partia maqedonase, ajo Liberale Demokratike (PLD), e cila, pasi vetëkonsiderohet e shqetësuar me atë çka po ndodh, ngërçin e pazakontë politik, paralajmëron se bllokimi i proceseve eurointegruese është kërcënimi më i madh për unitaritetin e Republikës së Maqedonisë.
“Dëshira e 75% të qytetarëve të Maqedonisë që të jemi anëtarë të BE-së dhe NATO-s është garanci e vetme për unitaritetin, stabilitetin dhe prosperitetin ekonomik të të gjithë qytetarëve. Porositë e eurokomesarit për zgjerim dhe fqinjësi të mirë, Johanes Hahn, janë të qarta dhe pa mëdyshëse. Të mos luajmë me zjarr, pasi që lehtë mundemi që të digjemi”, thuhet në një deklaratë të kësaj partie.
Për më tepër, PLD apelon te BE që nëse vendosen sanksione të caktuara ndaj Maqedonisë, të njëjtat t’i përfshijnë vetëm disa individë të cilët e rrezikojnë paqen dhe stabilitetin e rajonit, dhe jo që kjo situatë të reflektojë ndaj të gjithë qytetarëve. /tesheshi.com/
