Nuk është shaka dhe mundet që Monika Kryemadhi të hyjë në histori në lidhje me propozimin që ka bërë së fundi në një strategji për ta ç’kanabizuar Shqipërinë.
Sipas saj, në vend të kësaj fare që i duhet “shuar fara” të mbyllet shafran, një bimë e cila ka një çmim të shtrenjtë në tregun botëror dhe që siguron të ardhura të majme. “Ne jemi duke punuar për një strategji shumë interesante e cila shumë shpejt do të prezantohet për të bërë të kundërtën e asaj që po ndodh sot në Shqipëri, pra për të bërë të kundërtën e zhvillimit të kanabisit, për të rritur një kulturë tjetër e cila është shumë më e shtrenjtë, shumë më e kultivueshme, e cila është shafrani, e cila në Dumre është një zonë eksperimentale dhe të ardhurat janë të mëdha”, tha znj. Kryemadhi, deputete e LSI-së.
Por mos i vjen era fushatë këtij propozimi?
“Unë nuk mendoj që po përdoret për fushatë, duke pasur parasysh që çdo gabim që bën qeveria, ana tjetër e përdor për fushatë, ashtu sikurse çdo të mirë që bën qeveria apo institucionet që kanë për detyrë ta bëjnë, nuk mendoj që përdoret për fushatë”, shtoi bashkëshortja e Metës.
Deklarimet e deputetes Kryemadhi u bënë nga Elbasani, ku bashkë me kolegët, ministrin Edmond Panariti dhe deputetin Taulant Balla, bënë kompensimin e fermerëve të dëmtuar nga dermatoza nodulare. /tesheshi.com/
