Kryeministri Rama tha në një intervistë për Euroneës në gjuhën greke se Shqipëria është shembull i respektimit të minoriteteve, ku veçon ai grek në jug.
“Shqipëria është një shembull i ndritshëm i respektit për të gjitha pakicat dhe për grekët, të cilët kanë jetuar atje për shumë vite, në të njëjtat kushte si shqiptarët. Po, kur ka probleme, ato janë të njëjta për të gjithë, jo për një pakicë apo tjetrën”, deklaroi Rama.
Nga ana tjetër, është konfirmuar se kryemnistri Mitsotakis do vizitojë Shqipërinë së afërmi, ku do shohë me “sytë e tij” në afër se si qëndron e vërteta mbi minoritetin, për të cilin politika e Athinës gjithnjë pretendon se i shkelen të drejtat, pa artikuluar asnjëherë konkretisht se për ç’të drejta është fjala.
“Mitsotakis shprehu dëshirën që të vizitojë Shqipërinë për të krijuar një ide me sytë e tij mbi situatën e minoriteteve në Shqipëri”, raporton TCH, referuar informacionit të marrë nga korrespondenti në Athinë, ku Rama pati një takim me homologun grek.
Ndërkohë, rastin “Kacifas”, Rama e komentoi kështu, duke mohuar se dojetë shkak për ndonjë konflikt: “Besoj se historia e dy komuniteteve tregon që nëse politika ose agjendat e ndryshme politike nuk ndërhyjnë, komunitetet janë një. Prandaj nuk ka ndarje apo urrejtje në zemrat e komuniteteve ku shqiptarët dhe grekët kanë jetuar së bashku për shumë vite. Ata janë një shembull i shkëlqyeshëm se si politika duhet të merret me faktin se ne jemi fqinjë dhe sa ‘të mallkuar’ jemi për të jetuar së bashku dhe ta duam njëri-tjetrin. Nëse politika nuk fut hundët për interesa të brendshme dhe përpiqet të fitojë mbështetje duke ushqyer urrejtje, asgjë e keqe nuk mund të ndodhë”.
Sa i përket marrëveshjeve të dakortësuara në parim me qeverinë e Tsiprasit, Rama tha se dhe me Mitsotakisin do vijohet me të njëjtën frymë. “Ne kemi punuar me qeverinë e mëparshme për disa kohë dhe kemi bërë përparim të konsiderueshëm. Duhet të vazhdojmë të punojmë me qeverinë e re, duke shpresuar se do të gjendet një konsensus”, theksoi kreu i qeverisë shqiptare. /tesheshi.com/
