Nga Gani Gashi
Mitrovica ka shumë të veçanta, gjë që e bëjnë atë një qytet shumë karakteristik jo vetëm në Kosovë, por edhe në Evropë dhe Botë.
Fjala vjen,është një qytet i ndarë në dysh, me një urë që në mes ka një ‘Park të Paqes’, pa paqe asgjëkundi, veriun e qytetit që nuk do t`ja dijë për shtet e ligj, me 4 lumenj, me minierën e Stan Tërgut; e së fundi këtyre pritet t`u shtohet edhe një kopsht për fëmijë, për faktin se do të ndërtohet në oborrin e një spitali.
Më konkretisht, Komuna e Mitrovicës së jugut, parasheh që në oborrin e spitalit të Mitrovicës që gjendet në lagjen ‘Bari’, të ndërtojnë një çerdhe për fëmijë.
Kështu së paku është thënë në Komitetin për Politike e Financa të Komunës, ku kryetari Agim Bahtiri, propozon miratimin paraprak të vendimit për dhënien e pronës së paluajtshme të Komunës në shfrytëzim personave fizik-juridik të tokës ndërtimore me sipërfaqe të përgjithshme prej 2151 m/katror dhe e njëjta të ridestinohet për ndërtimin e një çerdheje për fëmijë, tek vendi i quajtur ‘Bari’ (siç shihet në dokumentin zyrtar në foton kryesore).
Por lidhur me këtë propozim vendim të Komunës së Mitrovicës për ndërtimin e një çerdheje të fëmijëve në oborrin e spitalit,
Shoqëria Civile, ekspertët e Shëndetit si dhe opozita, janë kundër për arsye të sigurisë së shëndetit të fëmijëve.
“Nuk ka askund në botë që institucionet shtetërore, e në këtë rast ato komunale, të japin leje për ndërtimin një çerdhe fëmijësh në oborrin e një spitali”, ka thënë nga opozita Faruk Mujka, kryetari i grupit të asamblistëve të Vetëvendosjes në Komunën e Mitrovicës.
“Unë nuk di e as që kam dëgjuar që të ndërtohet çerdhe në oborrin e spitalit diku në botë, kjo ndodh vetëm në Mitrovicë”, ka shtuar Mujka.
Propozimi i kryetarit të Komunës së Mitrovicës, këto ditë do të jetë në seancën e Kuvendit Komunal, e grupi asamblistëve të VV ka paralajmëruar se do të votojë “kundër”, duke arsyetuar se të vetmin qëllim ka mbrojtjen e fëmijët nga sëmundjet e ndryshme.
Sipas asambleistit Mujka, në gjithë botën çerdhet e fëmijëve ndërtohen në vende sa ma larg zhurmëve së qytetit, në vende ku janë të gjelbëruara, e kurrsesi në oborret spitalesh që dihet se nga ç`kategori njerëzore frekuntohen.
Në anën tjetër, Lulzim Hakaj nga Shoqëria civile i ka thënë portalit tesheshi.com se vetëm propozimi që një çerdhe e fëmijëve të ndërtohet në oborrin e spitalit nuk do koment, e le më që në realitet aty të ndërtohet vërtet një objekt për destinim të tillë.
“Ne duhet të kemi parasysh së pari kushtet në të cilat janë spitalet tona në Kosovë në përgjithësi, ku rreziku nga ndonjë infeksion tek fëmijët është permanent”, ka thënë Hakaj.
“Nuk besoj se asamblistët, pra njerëzit e zgjedhur nga vota e qytetarëve do ta bëjnë një gabim kaq të madh duke lejuar ndërtimin e çerdhes së fëmijëve në vendin ku më së shumti ka persona të sëmurë, pra në oborrin e një spitali”, ka shtuar ai.
Dhe sipas Hakajt, me norma ndërkombëtare nuk lejohet që një çerdhe fëmijësh të ndërtohet përballë një objekti spitalor për të sëmurë mental; e nëse çerdhja do të ndërtohet, thotë ai, atëherë kjo do të jetë vetëm 10 metra larg këtij spitali në vijë ajrore.
“Karakteristikave të shumta të qytetit të Mitrovicës, e çudive gjithashtu, që na bëjnë si një nga qytetet më unike të botës siç është ndarja në dysh me ‘Park të Paqes’ pikërisht për shkak të mungesës së paqes, etj. do t`i shtohet tashmë dhe një çerdhe fëmijësh në oborrin e një spitali”, ka ironizuar Hakaj nga Shoqëria Civile.
Kundër këtij projekti të Komunës së Mitrovicës shprehet dhe Luljeta Zhubi-Buçinca, shefe e spitalit të Infektologjisë në Mitrovicë. Ajo thotë se në perëndim është ndeshur personalisht me raste të çerdheve afër objekteve spitaleve, por është fjala vetëm për çerdhe apostafat për fëmijët e personelit të spitalit.
“Nëse edhe kjo çerdhe për fëmijë ndërtohet vetëm për fëmijët e të punësuarve në spital, kjo është në rregull; në të kundërtën, kjo është e papranueshme dhe nuk duhet të ndodh”, ka thënë Zhubi-Buçinca, që shton nga ana e saj se ato lloj çerdhesh që ka parë në botë e që ishin për fëmijët e personelit spitalor, kishin njëherësh dhe kushte ekstreme të sigurisë sa i përket aspektit shëndetësor.
Më tej ajo thotë se oborri i spitalit është mbingarkuar shumë pasiqë aty është edhe shkolla e mesme e Mjekësisë që po ndërtohet, si dhe në afërsi të madhe me vendin ku është paraparë të ndërtohet çerdhja (nëse do ndërtohet), janë edhe spitali i Pediatrisë si dhe spitali apo qendra për të sëmurët mentalë”.
Në anën tjetër, zyrtarë komunale të Mitrovicës shprehen të bindur se po bëjnë gjënë e duhur. Edhe ata nga ana tyre pretendojnë se ndërtimi i një çerdhe fëmijësh në oborrin e një spitali është normale, duke thënë se të tilla ka shumë nëpër botë. /tesheshi.com/
