Siç është vënë re këto javë, “Tahiri” është bërë çështje dite, e nate po ashtu, me informacione, raportime e debate pa fund, ku panelet gëlojnë nga kronikanë (gazetarë kronike), që ofrojnë, ndër të tjera edhe skema plot fiction, për atë se ç’fshihet pas ish-kreut të Rendit, dje dhe sot.
Por shumë më para daljes në skenë të tij, çështje dite ishte CEZ, që fare mirë mund të konsiderohet si “droga” e ish-qeverisjes Berisha, edhe me Metën brenda, prej elementit Ismailaj, një aferë deri dhe kriminale, në raport me përmësën e dyshuar të korrupsionit në të cilin janë një sërë ish-ministrash e zyrtarësh të lartë shteti, së paku duke iu referuar dosjes së ofruar nga Romeo Kara, një njeri po aq për t’u dëgjuar, sa ç’dëgjohet kronikani Tan Hoxha, kur flet për afera kriminale. Mirëpo ka një diferencë ulëritëse mes dy çështjeve: ajo e trajtesës mediatike ne nivel “debati në studio”. Prej kur shpërtheu CEZ e deri më sot, nuk është organizuar asnjë debat televiziv në lidhje me këtë çështje të nxehtë, e po ashtu, Romeo Kara nuk është ftuar kurrë të flasë për të, po në studio debati, veç disa një prononcimi dikur, në fillimet e daljes së dosjes, intervistuar nga Top Channel në zyrën e tij.
Edhe vetë Kara thekson se nuk është thirrur asnjëherë nga drejtuesit e emisioneve kryesore në vend. Që do të thotë se asnjëherë në mediat kryesore nuk është bërë një histori lidhëse e aferës CEZ: nga privatizimi, pagesa e parave, kontratat, borxhet, ulja e çmimeve për blerjen e energjisë nga KESH, caktimi i kompanisë që voli borxhet, sa ishte fitimi, si u morën paratë, pse brenda ditës u tërhoqen 7 milionë euro nga një bankë e nivelit të dytë e të tjera.
Kjo aferë ka brenda disa dimensione pasi flitet për ndikim politik në privatizim, shpërdorim forndesh publike, dhënie monopoli për mbledhjen e borxheve të OSHE, pastrim parash, mashtrim dhe abuzim.
Për këtë çështje ka një vendim të një gjykate shqiptare, e cila ka dënuar Kastriot ismailajt, kreun e DIA-s, kompanisë që iu dha e drejta të mbledhë borxhet e CEZ. Ismailaj u shpall fajtor për mashtrim dhe u dënua me 11 vjet burg nga shkalla e parë në Tiranë. Përveç Ismailajt, çështja ka një qytetar, ish-punonjës i DIA-s, Romeo Kara, i cili ka marrë përsipër me vullnet të lirë të tregojë atë çka ai di për këtë aferë.
Përveç Romeo Kara, kemi patur edhe një komision parlamentar, i cili vetëm me votat e PS-së (pasi PD u largua) depozitoi në Prokurori një padi ndaj disa ish-zyrtarëve të lartë të shtetit shqiptar, por edhe personave të tjerë të lidhur me ngjarjen. Por Prokuroria e mbylli çështjen.
Romeo Kara, thotë për tesheshi.com se ka furnizuar prokurorinë me material shumë voluminoz.
“Në periudhën maj-qershor-korrik kam qenë mjaft aktiv në dërgimin e materialeve shumë të rëndësishme. Mbi 10 herë për të dhënë shpjegime mbi kallëzimin që ishte voluminoz dhe me shumë prova të shoqëruara”, thotë Kara.
Dhe e përsërisim: deri tani nuk është bërë asnjë emision televiziv prej atyre që janë në prime-time mbi këtë çështje. Asnjë! Si ka mundësi?!
Kur kjo aferë shpërtheu në fillimet e saj, Blendi Fevziu, hapi Opinion-in e tij me arrestimin e Kastriot Ismailajt ku përmendi tangent edhe Romeo Karajn. Por më pas gjithçka u la në heshtje.
Ndërkohë, është dhe lajmi tjetër, ai i mbylljes së dosjes, që sërish, nëse bëjmë një paralelizëm me “Tahirin”, është njësoj sikur të ishe mbyllur dosja e këtij të fundit e ish-ministri i përlyer i Ramës të kish rezultuar qelibar. Kjo e dyta do ishte çmenduria vetë po të ndodhte, e padyshim debati do flakëronte në studio televizive; por ja që diçka e tillë nuk ndodh për dosjen CEZ.
A meritonte mbyllja e çështjes nga Prokuroria një trajtim në emisionet e mëdha në tv-të tona, qoftë edhe për të ballafaquar palët? Aq më tepër që ka një vendim gjykate, dikush është dënuar për mashtrim me paratë e CEZ. Po kush e lejoi Kastriot Ismailajn të mashtrojë? Prokuroria duhet të kishte shkruar diçka në dosje pastaj ta mbyllte atë. Ose ta linte që të ishte SPAK-u, Prokuroria Speciale me fonde dhe njerëz më shumë për ta hetuar. Dhe ishte e larë.
Por më e bukura – e shëmtuara në fakt – e kësaj çështjeje, është se të gjithë mediat kryesore që nuk merren me CEZ-in, po aq llahtarë sa “Tahiri”, marrin çdo ditë miliona lekë reklama nga ana e OSHE-së. /tesheshi.com/
