Mbetet mister përmbajtja e një letre që ambasadori Lu ia përcolli Ilir Metës, të mërkurën në një konferencë, aty ku kreu i diplomacisë së Uashingtonit në Tiranë lëshoi rrufe përcëlluese ndaj mazhorancës për moskapjen prej 7 muajsh të Kelmend Balilit, të cilësuar nga autoritetet greke si “Eskobari i Ballkanit”.
Dihet tashmë që fjalët e gjestet e diplomatëve, sidomos kur janë në aksione të qarta diplomatike, nuk janë kurrë të rastësishme. Ato janë bartëse mesazhesh, që zakonisht zbërthehen apo ç’kodifikohen në kohë, varësisht zhvillimeve që i pasojnë.
Lu nuk kishte pse t’i përcillte një copë letër Metës në atë lloj forme, faqe publikut, në kulmin e denoncimit të shtetit, pjesë e rëndësishme dhe e qenësishme e të cilit është dhe kreu i LSI-së dhe njëherësh kreu i Kuvendit, për të mos thënë gjysma e shtetit.
Në kishte diçka për t’i thënë, mund ta bëntë këtë gjë verbalisht; asnjë metër larg nuk e kishte.
Ndërsa zgjedhja për t’i përcjellë dy gisht letër në një formë të pazakontë dhe krejtësisht jo-protokollare, të paktën mund të hamendësohet lehtësisht që ka patur shumë “Balil” brenda.
Po të vihet re, në të gjithë narrativën mediatike që ka në qendër delvinjotin bujëmadh, askund nuk thuhet se ai ishte një zyrtar i LSI-së. Po! Kelmend Balili ishte një nga drejtorët e LSI-së që drejtonte Drejtorinë e Transportit Rrugor Sarandë. Dhe për më tepër, ai vinte në atë post pa asnjë karrierë zyrtare. Pra, në terma jo ligjorë por politikë, LSI dhe Ilir Meta duhej të ishin të kryqëzuarit e mëdhenj për çështjen “Balili”.
Mirëpo përkundër kësaj, ky i fundit, i gjendur dhe “nën mëshirën” e opozitës që nuk e artikulon këtë fakt, me shpresë për ta mbajtur me të mirë njeriun e vetëm që mund ta risjellë në pushtet, vijon të promovohet si parimori i flaktë i politikës shqiptare, ku deklarimet rutinore të tij që bijnë era atdhedashuri të flaktë, media ia servir publikut pa asnjë “censurim moral”.
Ditë më parë, në Konventën e LSI-së Meta do shpërthente kundër kanabisit qeveritar, që në fakt ishte “dueli i tij i ftohtë” me Ramën me drogën si armë; por mjaft të mendosh që një zyrtar i tij akuzohet si “baron droge”, ose “Eskobari i Ballkanit”, sipas cilësimit që i bën media e vendit fqinj, për të kuptuar se në dorë të kujt janë fatet e këtij ky vend.
Meta ka qenë në shumë studio televizive këto 7 muaj që kur në skenë doli Balili. Së fundi ishte dhe tek “Të paekspozuarit” e Ylli Rakipit, aty ku mëtohet se gjërat thuhen pak më troç. Por askush nuk e pyeti se si ka mundësi që partia e tij, aq parimore, aq në ballë të integrimit europian e të një Shqipërie ku mbillen perime, zarzavate e jo hashash, emëron në krye të një institucioni njeriun që vendi fqinj e konsiderin “Eskobarin e Ballkanit”! /tesheshi.com/
